今次建制派民主選舉，出動到社團大佬，羅范堂堂前老廉阿頭兼現任人大代表，為拉票同大佬同枱食飯，睇見真係該煨眼寃。據聞中央各有關部門正埋首寫報告，好快呈交中央拍板，呢份報告真係唔知點寫。相信振英未當選，也要盡快同「地獄內閣」切割，一定要推乾推淨，如果上身，選到都有機會拉番落馬。
振英扮好人政務官唔受
另一邊廂唐唐大炸彈一個接一個，今次借TVB主動引爆私生女，再由「香港希拉莉」郭妤淺單槍匹馬去商台解畫，由於唐太乃超班馬，結果成功止蝕，拆除了大炸彈。有時諗返轉頭，唐唐真係一世夠運，炸咁多次都未散。另一奇人係任志剛白頭佬，上星期兩會「夢熊大師」揳位握手人工製造領導人祝聖場面，人人以為振英700票當選在望，好一個白頭佬不離不棄，周一仍代表唐營去電台論壇講經濟，白頭佬對住單仲偕及陳茂波，當然係超晒班。
如果鬥班底，振英「地獄內閣」好難同唐唐主流精英鬥，所以梁營最近頻頻吹風爭取公務員支持，一時又話搵林煥光、陳子政，一時又話唔會再用林D9，改用葉劉做政務司，羅范唔做官，甚至唔識「夢熊大師」。又話可沿用大部份煲呔內閣云云，總之目的係安撫人心，但政務官完全唔受，因為大家目睹梁背後支持勢力的手法，心都寒晒，家扮好人，真係當班政務官係儍人？
豬狼隨時同日玩完
今次鬥到咁殘，去到盡，梁要當選，難矣！挺梁者一直向中央進言，指唐唐低民望當選，今年7.1會有數十萬群眾上街歡迎中央領導。本來呢招靠嚇有用，可惜家振英民望雖比唐唐高，但既有西九聆訊跟尾，又有社團涉嫌拉票，而在3月25日至6月30日之間，肯定會不停有振英醜聞登場，加上巿民並非真心支持佢。去到7月1日，結果又係幾十萬人上街。
難怪最近流選之說又再風行，若唐第一回投票衝擊失敗，而中央寧流選也不支持振英，兩人政治生命便同日完結。第二回將會是全新景象。
添馬男