中國古代有陳世美不認妻，香港家亦有「生蔥」為做豪門女婿，狠撇糟糠，估唔到喺英國亦有羽毛球手為圓奧運夢而飛起女友兼混雙拍檔，轉為同後者嘅宿敵拍檔，仲搞到兩女透過社交網頁大戰㖭！
英國球手艾確（ChrisAdcock）細細個打少年組嘅賽事時，已經同韋芝（GabrielleWhite）拍檔混雙兼拍拖。不過，喺舊年，23歲嘅艾確有感於成績停滯不前，於是毅然飛咗21歲嘅韋芝，改為同24歲來自蘇格蘭嘅金髮靚女班姬雅（ImogenBankier）拍檔。
新歡舊愛網上罵戰
同班姬雅拍檔之後，艾確嘅成績真係進步咗好多，喺舊年嘅羽毛球世錦賽奪得混雙亞軍；而喺日前嘅全英羽毛球超級賽混雙首圈，佢哋亦爆冷以2:1反勝賽事首號種籽中國組合張楠同趙芸蕾，晉身倫敦奧運嘅機會高唱入雲。艾確同班姬雅無論喺場內場外，都似乎越嚟越有默契。
所謂只見新人笑，被艾確飛咗嘅韋芝就好不是味兒，而最令佢㷫嘅係班姬雅早前喺社交網頁度，話唔明點解英格蘭球手咁渣，韋芝覺得班姬雅係影射緊佢，所以就喺Twitter度發炮話班姬雅刻薄；韋芝嘅朋友兼女雙拍檔珍妮禾獲克亦加埋把口，一齊圍攻班姬雅，事件最後要英羽總介入，要「涉案」嘅女球手全部道歉先至收到科。
英羽總幕後玩家
艾確阿媽丹妮絲見自己個仔搞出咁多事，亦出嚟解話，話艾確換拍檔係英羽總嘅意思，丹妮絲話：「決定拆散艾確同韋芝組合嘅係英羽總，艾確根本冇得選擇；而且據我所知，艾確同韋芝仍然係一對好甜蜜嘅情侶。」
講番全英賽嘅戰果，香港隊男女單3位選手喺首圈全軍覆沒。黃永棋面對中國嘅陳金，雖然佢喺上月底嘅瑞士公開賽爆冷贏波，但今場進攻路數俾對方睇穿，輸13:21同11:21，隊友胡贇亦0:2輸畀越南嘅阮天明；女單嘅「黑妹」葉姵延遭同一命運，0:2輸畀泰國嘅拉特查洛，第一圈止步。