美國百變天后LadyGaGa5月首度來港開騷，最貴的1,580元門票最高被炒至30,000元，令一眾黃牛黨趨之若鶩，但加至第3場的門票炒價已漸見回軟，昨日主辦商宣佈加開5月7日第4場，大前日黃牛黨已出現散飛潮。而明日發售的加場門票只供網上及電話發售，不設門市售票，以趕絕排隊黨。
美國天后LadyGaGa「TheBornThisWayBall」演唱會已訂於5月2、3、5日假赤鱲角亞洲博覽館舉行，昨日主辦單位LiveNation宣佈將於5月7日再加開第4場，明日早上10時開始只接受網上快達票www.hkticketing.com，及電話熱線3128-8288購票，每人只限買4張，今次將不設門市售票，通利琴行和六個演出場館都不會發售，亦是香港演唱會首次不設門市售票服務。
網上售票難監察
至於今次有多少門票供公開發售，LiveNation暫未有回覆，只是今次門票只透過網上及電話購買，似乎比在門市購買的途徑更難監察。有消息指美國運通（AE）信用卡的黑卡會員昨日已可優先購買門票。
早前GaGa宣佈首度來港獻唱，旋即出現一陣撲飛潮，不久即被搶購一空，最貴的1,580元門票一度被炒高至30,000元「癲價」，一眾黃牛黨、南亞排隊黨群情洶湧，通宵達旦瞓街輪候，甚至有人排隊排到嘔白泡，皆因門票在內地有價有市，而網上有人手執數百張門票炒賣，也令香港廉政公署介入調查是否有人扣起門票私賣。
內地網賣「票花」
其實門票開售初期，炒家炒賣最貴門票，粗略估計每張可賺約3,000港元，成最大得益者，排隊黨也可賺取每小時100元時薪，但隨着演唱會一再加場，炒價漸漸偏軟兼開始見頂回落。
而大前日更驚現散飛潮，網上炒價突然由5,000元跌至3,000元，懷疑內部有人早知即將加場，趁加場消息未公佈前快快割價恐慌性拋售，減低炒燶機會，昨日加場消息未正式公佈，內地淘寶網已有人以1,700元預售加場原價1,280元的門票，此賣家似有百分百信心買到加場門票。若然仍有人手持大量門票，勢必炒燶，只有排隊黨賺時薪100元能袋袋平安！
首批買到40張飛的王賢誌昨日說：「唔使再益晒排隊黨，今次最冇損失係排隊黨，我買咗飛後，好多朋友嘅朋友託話叫我5,000至6,000蚊讓出嚟，我動搖過㗎，但賣咗就買唔番，咁耐以嚟未有人出10,000蚊。」
「益晒頭批炒家」
經理人黃柏高則說：「明知開4場，應該一早就公佈開4場喇，唔使炒得咁瘋狂，益晒頭批炒家，市場會越嚟越多飛掟出嚟，但我仲未收到主辦單位通知訂到幾多，總之多多都要，希望最少攞到100張，好多朋友託我買。」內部訂購300張票的寰亞執行董事陳志光說：「我已經縮到只訂30張，但都未收到通知有冇飛，希望再加多一場可以分配到飛啦，聽聞炒家喺噚日已經收到風會加場，噚日已經開始跌價，一向黃牛黨風險好大。」 採訪：林妃