馮仁昭四圍超：Cammi鬧雙胞尖面互拮 - 馮仁昭

模謝芷蕙（Cammi）因同陳冠希流出親熱照而上位，可惜普遍香港人都唔係咁buy，覺得佢係自製新聞，好彩仲有內地市場，最近佢同經理人Admond上咗溫州做酒吧騷搵人仔，仲喺微博放咗張同「姐姐」嘅合照。聽講Cammi係獨生女，但兩個驟眼睇又真係撞晒樣，十足兩生花，一樣係面長、眼大嘅疑似整容樣，不過呢位姐姐個樣仲嚇人，條眉直到可以用間尺度，仲有個拮死人嘅尖下巴。

被駡心理有病

而今次呢個內地騷仲發生咗小插曲，一名叫「明星經紀人吴名」喺Admond嘅微博上留言話同Cammi簽咗內地經理人合約，通知佢要立即停止演出，仲好唔客氣話：「我都知你（Cammi）心理有疾病，但想不到職業道德也有問題。」Admond即作反擊，話佢講嘅嘢完全唔係事實，誹謗Cammi嘅名聲，會保留一切法律追究權利！不過，明星經紀人吴名冇收口，仲自稱有證據遲啲攞出嚟，言之鑿鑿話有份內地夜場演出獨家代理合約係1月27日銅鑼灣一間餐廳內簽嘅，有幾位路過嘅網友都留言撐經紀人。