車路士領隊呢份工雖則唔易做，不過勝在人工高又夠face，所以大把人爭住做。其中賓尼迪斯同埋艾歷臣仲率先同油王阿巴莫域治送秋波，而摩連奴更加填埋要求待遇，就係年薪1,200萬鎊（約1.47億港元）；若然以每日做8粒鐘計，時薪就有成4,167鎊（約51,200港元）。真係要好似摩佬咁有料，先至夠膽死叫咁高人工。
大熱之選時薪值5萬
車仔喺禮拜日炒咗波亞斯，仲未搵到正式繼任人，所以由迪馬堤奧暫時頂到季尾先。英國傳媒啲料就日日新鮮，繼摩連奴、賓尼迪斯同埋哥迪奧拿之後，日前連德軍主帥路維同前英格蘭國家隊領隊艾歷臣都煲埋；其中齊齊待業嘅賓尼迪斯同埋艾歷臣更加率先表態，話好樂意去教車仔。至於家教緊皇馬嘅摩佬，雖然喺07年同油王翻面收場，但因為佢份CV太勁；先後贏過英超、意甲同埋葡超，又幫波圖同埋國米捧走歐聯，所以就算當年不歡而散，亦被捧成做2.75倍嘅頂頭大熱。
摩佬知道車仔好想搵番佢，於是亦老實唔客氣，消息話佢已向油王開出兩個條件；第一個就係年薪要有1,200萬鎊；另外一個就係要帶埋基斯坦奴朗拿度過嚟，咁即係話要車仔用天價同皇馬簽C朗啦。如果佢真係以呢個價返車仔，時薪就超過5萬蚊港元，等於普羅市民約半年人工，真係恨死隔籬。
迪馬堤奧搵自己友幫拖
至於暫時教住車仔嘅迪馬堤奧，喺禮拜一首次帶隊操練，而佢亦即刻搵番前車仔中場紐頓返嚟幫手，仲希望透過對方英國人嘅身份，可以同泰利、林伯等本土老波骨打好關係。另外，英國傳媒話波仔俾油王請食無情雞嘅時候，忍唔住流馬尿，不過，我求大俠相信佢好快就會開心番，點解？因為聽講意甲羅馬搵佢，計劃以佢代替好唔掂檔嘅少帥安歷基。