繼溫總早前話唔保八之後，壞消息接二連三殺到，AIG出爾反爾配售友邦（1299），結果批股價都守唔到；同一時間，市傳高盛又話想減持工行（1398），內銀股即刻跌到一仆一碌。飛去歐洲睇吓，上星期歐央行批出第二輪LTRO，總額達5300億歐元，諗住銀行會鬆手放水，幫手振興經濟，點知啲錢原來又回流番晒去歐央行，隔夜存款仲創8210億歐元新高。咁嘅情況之下，個市有咩辦法唔隊，噚日一劑就插穿21000，恒指牛熊線亦守唔住，最肉酸係之前熱炒嘅板塊如水泥、汽車、航運等，全部跌幅起碼半成，走鬼味濃。
短線如果有反彈，就係逃生之時，戰友們請把握機會。預期後市下一步會退守2萬關，不如做定功課準備撈底。TCL多媒體（1070）去年成功扭虧為盈，仲派末期息16仙，集團呈淨現金狀態，財務穩健，噚日收報3.47元，跌4.4%，候3.20元水平吸納，屆時息率有近5厘。
唐牛