宅錄：租酒倉　有後備電　穩陣！

唐生的私人地下酒窖風波，令佢人氣大跌，為咗個人興趣而令前途受阻，認真替佢嘆氣！其實香港都有好多有質素嘅酒窖，有啲仲24小時營業，有埋好有情調嘅品酒區俾你慢慢嘆，今日就為大家一一介紹，無謂以身試法吖！

記者：張文蕙
攝影：蔡家輝
Model：Coco@GME
鳴謝：HongKongWineSchool（23113101）

保護全面
木香四溢　保酒原味

位於葵涌的VictoriaWineCellar，是紅酒愛好者WilsonWong斥資千萬所建：「在保安上，須經指紋辨識及拍卡才能進倉，全層皆倉亦免了閒雜人等！」唔講唔知，全層式設計，更能防止隔籬廠房人搬運貨物，震親你心愛的紅酒：「在防震方面，造倉時更用上八吋防震牆壁，亦有隔溫之效。」
倉門及倉內，全用堅葡萄牙松木，並經過炭化加工，以零化學物釋放為大前提，以防酒質變味：「我哋嘅燈光亦盡量調暗，可保障靚酒唔會曬親！」倉內有恆溫恆濕系統，但停電又點？「我哋有後備電，而且隔溫做得好；試過測試，就算停電五日，氣溫都只微升1℃。」品酒區燈光昏黃，充滿維多利亞風味！仲有埋自助廚房，三五知己相聚、想翻叮吓芝士麪包食都仲得：「我哋希望保安做得更好，所以開放只限辦公時間，但客人有需要都可以預約。」

■品酒區欄杆特闊，方便站着傾談時，放酒杯。

■大門外設指紋辨識系統，進入貯藏室前，先要在識別器拍卡。

■倉內已有酒架，圓拱形倉頂更有瀉水功能，防埋水災！

VictoriaWineCellar（24289168）

收費：
酒櫃（約450支）$1,800/月
17ft囗（約800支）$3,300/月
34ft囗（約1,500支）$4,300/月
90ft囗（約4,500支）$7,500-$8,500/月
地址：葵涌葵昌路40-52號葵昌中心2樓全層

住家Feel
人面辨識　24小時品酒

儲存酒嘅最佳溫度係13-15℃，有品酒愛好者試過在家中整酒窖，以為有冷氣、有放濕機就無問題，結果漏咗隔溫呢一步，出出入入時牆身出晒倒汗水，衰晒！美酒窖董事總經理HubertLi：「將常飲的百幾支放喺屋企電子酒櫃，其他寶貝就應放入倉內；我哋嘅倉可謂四面恆溫，停電的話也只升2℃，地面、牆壁用咗80mm高密度聚氨酯隔熱材料，個倉門根本就係巨型電櫃門，我哋連個天花都隔埋溫！」
想要私人空間呢度都俾到你，每個倉都獨立如一間房，門口是通花設計，美酒窖屬24小時營業，並用上京奧VIP房的保安系統──知能卡及容貌辨識系統：「如果個客仲擔心，我哋都可代辦保險，及獨立加裝指紋辨識，咁樣就算被劫，個客都有得賠！」

■人面辨識功能，方便用家24小時出入。

■照明燈設定在15分鐘後關掉，以防曬親啲酒。

■除了儲存，亦有售不同類型大小的酒。

■品酒區玩客、飯廳分隔設計，好Warm！

美酒窖（28701800）

收費：
42ft囗（約1,000支）$2,880/月
50ft囗（約1,100支）$3,280/月
地址：香港黃竹坑道52號合隆工業大廈5-7樓

最平！
平民倉　一樣Hi-tech

好多人搵Storefriendly都係擺雜物，但估唔到佢喺荃灣竟有一個合晒規格嘅紅酒倉！用歐製天然加壓碳化保溫層，具備防火阻燃功能，仲有埋動態照明，減少燈光對酒造成溫差；全自動後備電源系統，能於斷電後將室溫維持穩定。開倉價$1,000有找，同美酒窖一樣，可24小時出入，又有人面辨識保安，同即時轉播倉內動態嘅監察系統，夠全面！不過保險就要自行購買喇！

■設人面辨識及即時轉播倉內動態保安。

■倉內有天然加壓碳化保溫層，具防火阻燃功能。

■品酒室酒桶處處。

Storefriendly紅酒迷你倉（82088778）

收費：
32ft囗（約108支）$988/月
96ft囗（約246支）$1,888/月
192ft囗（約576支）$2,788/月
地址：荃灣沙嘴道57號荃運工業中心2期3樓K室

最天然！
天然防空洞　玻璃品酒區

外國酒窖多數都係天然地洞，香港寸金尺土，難得曾生批咗個防空洞，改建做酒窖！但專家指，香港天氣咁熱，就算用防空洞都只係噱頭，所以CrownWineCellars亦裝了最先進嘅電子恒溫系統，將氣溫維持喺13-14℃及濕度65-75%。
呢度行會籍制！入到防空洞裏面一啲霉味都無，仲有淡淡木香，1,000ft囗嘅洞穴經簡單裝修，一排排高至天花的層架共可放5,000箱酒，無乜私人空間，不過好在有送貨服務，只需加多$90至$530，藏酒或取酒就有專人服侍！