內地放棄保八，雖則話過往年年增長都超標，但今次放棄意義重大，反映經濟已脫離高速增長階段；另一致命點係通脹預測4%咁高，預示歐洲QE之下，通脹遲早番嚟，冇得放水刺激經濟。咁即係阿爺估實質經濟增長3.5%？咁悲觀，可大可小喎！
呢個預測嘅潛台詞相當可怕，就係隨時出現滯脹。如果環球滯脹，透過增加貨幣供應去紓緩歐債危機、刺激經濟，將換嚟通脹，跟住又㩒住唔准亂印銀紙，直至經濟衰退。
之前歐洲推出3年期融資約1萬億歐元，刺激市場大幅反彈，已反映歐債危機紓緩同經濟增長溫和，但未完全反映滯脹風險，你話未來向上定向下空間大？滯脹環境之下，企業收入上升，但成本飛升令盈利無法增長，即使恒指唔跌，市盈率亦會徐徐上升，咪以為恒指市盈率9.6倍唔高，指數就跌唔落。
之前都建議大家落場短炒，但家睇到資金流出港滙，人民幣滙價又下跌，亦係港股嘅短線致命因素。晉佳認為股市轉淡訊號已現，有貨就鬆人，反手轉沽都仲得。不過，睇番恒指小時圖9RSI跌到13.3，期指得番8.6，要造淡最好等多一等。
難以突破下望16元
內地將擴大內需列為首要任務，商務部就預測今年社會消費品零售額增14%，其實唔算好高，但你睇內需股估值仲係廿幾三十倍，值唔值先？內地超市股高鑫零售（6808）啱啱公佈業績，僅達市場預期下限，預測同店銷售得單位數增長；喺香港賣金畀內地豪客賣到滿堂紅嘅六福（590），新年港澳同店銷售表現差勁，只有4%增長；連濠賭股收入都放緩埋，可見內地人「血拼」都收晒火。
咁高檔次嘅金鷹商貿（3308）又點呢，一樣走唔甩增長放緩，充其量係業績穩定增長，好難有突破，券商預測每年盈利增長保持兩成，預測今年市盈率20倍，利好因素都反映晒，如果大市有乜閃失，金鷹喺現水平唔見得有支持力。
金鷹股價形成咗下跌通道，睇基本因素，好難有誘因突破通道頂20.70元，家股價喺接近通道頂回落，係時候去沽佢，下望16元冇乜走雞。
晉佳
本欄逢周一、三及五刊出