歌神張學友噚日喺經理人陳淑芬陪同下，完成溫州站巡迴演唱會返港，學友太太羅美薇早排喺馬會會所健身室兩度被男經理涉嫌出言性騷擾，馮仁昭噚日當然要問學友點睇件事啦，學友就好厚道咁話：「只係不禮貌對待啫，性騷擾係好嚴重嘅事，係刑事，我只係口頭投訴，冇寫信，每個人遇到呢種事，都會咁做，好正常，冇諗過會上新聞咁大件事。」
事緣羅美薇喺馬會健身期間，覺得隻眼唔舒服，嗰位經理問薇薇：「使唔使我幫你吹吓隻眼呀？吹唔吹呀？」又有次羅美薇手指傷咗，個經理向佢伸出中指問：「你手指傷咗呀？」羅美薇覺得被羞辱，學友為護妻向馬會投訴，馬會調查咗之後，涉性騷擾嘅經理已被解僱。
斥懶幽默
學友話嗰個經理係外籍人士講英文，學友仲話：「估佢係懶幽默啫，其實之前都有少少嘢發生咗，都係類似事件，但老婆冇馬上出聲，忍咗一陣，都係肢體同語言上唔適當表達。」問學友會唔會報警？佢話：「馬會已經調查緊，我唔想騷擾到其他會員，不過我有朋友係常客，佢都話見過呢個人有咁嘅行為。」