股評人陳永陸昨日如常出外午膳，但由於「飯腳」是經紀，他們要急急腳在一點開市前趕回證券行，陸叔惟有獨個兒殿後埋單。
大華繼顯董事梁偉源選擇外出買外賣，他形容有「外賣街」之稱的昭隆街氣氛相當緊張。
陸叔平日主要做電台財經節目，毋須定時定候埋位實金魚缸、等客戶電話落盤，食晏收料不用匆匆忙忙，但就要遷就「飯腳」，選擇就近「飯腳」工作地點的食肆午膳。
「噚日同經紀朋友食晏，佢哋12點55分就要走，我咪一個人留低食埋個甜品兼埋單囉」。
外賣街人龍倍增
要替基金經理落盤的梁偉源就完全無時間外出午膳，只可以到證券行附近的昭隆街買外賣，昭隆街有幾間主要賣外賣的食肆，有「外賣街」之稱。梁偉源指，排隊買外賣的人龍較以前長一倍，但食肆似乎早有準備，店員快手快腳，半分鐘內可以完成交易。
證券學會會長兼華誠證券老闆李細燕就非常貼心，為廿位同事包伙食，「班同事邊有時間出去食晏，其實以前都係一齊出去飲茶，而家就一齊坐喺公司食囉」。