諸葛紫岐（Marie）同Neway二少薛嘉麟早前已經喺美國秘密註冊，佢哋定咗本月20日喺灣仔會展擺婚宴，到時會筵開逾百席招呼親友，場面認真墟冚。近日Marie已四出為婚事張羅，事無大小佢都要做到盡善盡美，一於要留下美好嘅回憶。而且一對新人為咗有最佳狀態，已經進行地獄式減肥多時，不過Marie因為太緊張嘅關係，近日就病倒了，要密密睇中西醫雙管齊下。
好友速遞心頭好
為了有一個難忘嘅婚禮，本身係麪包超人狂迷嘅Marie就周圍搵有關公仔嚟佈置花車，連佢嘅日本通好朋友王友良，都即刻幫手為Marie搜羅心頭好，啱啱由東京返香港嘅王友良，前日即人肉速遞麪包超人公仔畀Marie，兩人順道相約喺中環嘆下午茶，王友良即好貼心送上小禮物，令Marie驚喜萬分，更加拎住公仔唔捨得放手，全程笑晒，據知Marie為報答王友良，答應下周四出席佢搞嘅活動，獻出婚前最後一擊。