一位讀者來郵問冒牌業主賣樓事件之豪宅有幾大呎數，左丁山唔知。羅便臣道15號，據中原數據網頁，高四層，有七個單位。一位對網頁十分熟悉嘅年輕人話俾左丁山聽，有關冒牌業主在1996年搵梁振英測量行將羅便臣道15號物業出售一事，可在一個www.hotdl.com搵到當年「明報」嘅有關報道，左丁山對此事雖有若干記憶，但較詳細資料係睇過呢個網頁嘅「明報專訊」得番嚟嘅，標題係「假業主賣半山地，莊士被騙3,000萬」。
有關梁振英「西九門」事件，立法會已通過行使「權力及特權法」，成立專責委員會調查。引用特權法，要功能組別及直選議員分組投票才通過，方可實施。本來係難事，譬如有議員欲以此法調查曾蔭權之「款待門」，唐英年之「僭建門」，都未能成功，原因好簡單，民建聯、工聯會議員全部要聽中聯辦旨意行事，在三件事上都要棄權；功能組別議員與泛民直選議員合作，就可以通過用特權法調查。雙方面就揀咗「西九門」一致行動。根據報道，中聯辦向十四位功能組別議員致電施壓：要佢地反對，結果黃宜弘、梁劉柔芬、劉皇發棄權，詹培忠、陳健波在投票時「剛好不在」，剩番林大輝、林健鋒、梁君彥、李國寶、石禮謙、何鍾泰、劉健儀、方剛、張宇人九位企硬不聽令，投贊成票，令到議案可以通過。
一位商界元老對左丁山講，商界選委全力挺唐反梁，「空前團結」咁交關，與有人放料打曾有關。曾蔭權因坐遊艇、私人飛機、租深圳住宅三件事遭猛烈攻擊，放料人似乎早有預謀策劃，出手之重，直情係想一棍打殘曾蔭權及以「株連法」做低唐英年，商界人士睇到心寒，驚住曾殘唐倒梁上之後，七月一日起冇日子好過，故此群起拒狼，不肯順攤做馴羊成為野狼的點心。元老話佢讀完陶傑在爽報（二月二十八日）之爽論，「特府燒通頂，廝殺大失控」，愈諗愈驚，誠恐曾蔭權讀過之法國大革命歷史重演！唉，陶傑真衰，篇文嚇到位元老回憶起1950年代鄉間鬥地主跪玻璃之場面，好心佢寫番啲冇咁得人驚嘅嘢啦！