香港嘅電影、劇集同歌曲，不時都俾人踢爆抄襲人哋其他地方嘅作品，唔怪之得搞到水準每況愈下，不過有幾多人真係肯坦白承認自己抄人，個個都堅持話係原創，如果真係咁啱，六合彩都有得中。最近黃真真嘅新戲《傾城之淚》喺香港上映，海報都出埋，但就被網友發現張海報居然同05年韓片《真的愛你》幾乎一模一樣。
真係夾埋都冇咁啱，《傾》同《真》片嘅海報都係分咗左右兩行，幾對主角一左一右，個個擺出喊樣，唯一唔同嘅咪係《真》有四對，而《傾》片只係有三對囉，驟眼望落去真係以為係同一套戲。
拍攝手法近似
《真》片當年都集合咗韓國幾位紅星演出，包括大家熟悉嘅鄭雨盛，車太鉉、林秀晶同申敏娥等，而《傾》就係由梁詠琪、任賢齊、陳喬恩、李治廷、竇驍同周冬雨合作。唔單止電影海報一樣，連拍攝手法都好相似，兩套戲都係由多個古仔串連而成，馮仁昭噚日搵過《傾》片嘅導演黃真真，但係佢唔喺香港返咗北京，所以未能從佢口中得知真相。