上個禮拜華華差啲俾一眾大行分析員嘅文采帶進夢鄉之際，忽然見到華華公司壹傳媒（282）出現喺報告入面，當堂精神晒。原來係大名鼎鼎嘅瑞銀分析員梁裕昌（Spencer）出報告唱好霸王（1338），佢舊年將利豐（494）目標價降到9蚊，迫到利豐出通告反擊，相信都係前無古人。霸王上星期五升咗超過兩成，人紅貼股果然係順手啲。
官司只提勝訴
報告大題話霸王短期有炒作因素，睇1.8蚊，聽佢點講：「霸王同壹傳媒單官司今年5月交換證人陳述書，如果霸王成功，有助挽回消費者信心。」
華華唔評論單官司，但贏輸呢家嘢不嬲係五五波，邊個敢寫包單，報告好似冇提如果唔成功會點喎！其次，官司打成點未必係大家最關心嘅事，不如大家做個民調，問吓自己老竇仲敢唔敢用霸王洗頭水吖！