勤+緣（2366）處04年上市以嚟低位，抵搞！勤+緣啱完成1供4，每股NAV攤薄到0.35元，但現價（0.148元）貼住歷史低位，折讓高達58%，喺同業當中，折讓算勁吸引。又勤+緣呢期拍住中央電視台，合作電視劇製作發行。市場裏面，同央視有業務關係嘅，仲有中視金橋（623，央視部份頻道、欄目廣告獨家承包商）。而中視金橋由上年10月到家陣翻半番，兼創埋上市新高，勤+緣等待發力。要咁睇，勤+緣拍到央視強勢夥伴，合資劇目兼可以喺央視頻道首播，有呢個優勢，本業坐定粒六。唔好計多，勤+緣本年度純利重返2010年度8000萬銀水位，全面攤薄效應計，PE都係8倍幾，翻半番到0.22元，PE只係12倍，依然平到爆。
南海折讓大待爆
南海石油（076）現價0.375元，又係低過08、09年金融海嘯價，另一家價殘股仔。又南海未計可換股債券攤薄效應，每股NAV1.72元，呢個低殘價嘅折讓，高達78%。而集團經過2月頭一棍爆上，之後就一路喺三年成交密集區再打底，平均線又扭埋一齊，醞釀爆邊。呢轉博南海爆上，係咁意博升20%到0.46元，未有耐上到NAV。
錢雋