上周財金界人氣主角，又係鄭裕彤。活躍股場的彤叔宣佈退休，市場上似乎唔太受落，包括新世界（017）系股份，以及其手持數隻細價股紛紛跌市贈慶。雖則彤叔聲稱會享清福歎世界，但股榮相信佢老人家得閒咗，一向鍾意「鋤大D」的彤叔，往後打牌聯誼的機會更多。
做得彤叔「牌友」，輸錢事少，結下情誼事大，君不見與其老友鬼鬼的大劉（劉鑾雄）及請特首坐私人飛機的張松橋，三者私交甚篤，就是鋤D鋤出真感情，因而被外界稱為「大D會」核心成員。
記得早兩年新股市場熱鬧，彤叔更是多間中資股基礎投資者，當時多隻內房股來港撲水，第一件事唔係去港交所交A1表格上市，而係去彤叔屋企打牌。恒大（3333）主席許家印喺自傳自爆，08年個個禮拜要同彤叔「鋤D」、同純官（鄭家純）鬥地主，一玩就玩通宵。
不過正所謂有付出，自然有回報，彤叔08及09年兩度入股，令水深火熱的恒大順利上市。有彤叔吹雞，包括楊受成、何柱國、大劉及張松橋等富豪、晒冷式一齊現身撐場。
佳兆業花樣年輸到怕
除了許總外，及後上市的內房如佳兆業（1638）及花樣年（1777），都邀得彤叔等助陣，其餘疑似D腳包括恒盛（845）及熔盛（1101）的老闆張志熔，兩間公司09及10年上市都獲彤叔支持，另外邱達昌旗下的麗悅酒店（2266），當然不能沒彤叔份。
當年有認購彤叔「鋤D股」的戰友，如果仍賴死唔走，睇睇附表，現時投降平均輸一半，感覺上就好似鋤D俾人炒完又炒，又或者鬥地主般俾人一炸、二炸再三炸。
除了新股，彤叔幫亦積極埋堆食大茶飯，2010年中策（235）收購台灣南山人壽，更向彤叔等配售CB集資78億元，換股價1毫子，更找來馬時亨及恒生（011）前大班柯清輝坐鎮，中策股價一度狂升至6毫子樓上，但收購交易最終不獲台灣監管機構批准而告吹，上周肥馬正式宣佈跳船唔玩。
新股以外的鋤D股，雖然劇本不同、但大致上都是原班人馬領銜演出，由蒙能（276）到國際資源（1051）以至中科礦業（985）等，財技大同小異，挾名人效應發CB配股集資，然後投資者二仔底死跟。富豪圍威喂，散仔當係寶，輸錢其實與人無尤。
股榮