「Fit佬」自從離開咗公仔箱之後，喺影壇發展非常順利，獎項攞完一個又一個，雖然家身價唔同晒，但佢份人冇架子，仲經常講笑人開心。早前「單蛋」同「半男」喺台上玩法式濕吻，全城嘩然，同時勾起Fit佬一段笑料十足嘅陣年舊事，佢話喺公仔箱拍劇年代遇過猴擒女星，當年嗰場戲係講Fit佬要瞓喺張床度扮冇知覺，女主角趁機錫佢一啖。Fit佬話一心諗住「輕吻淺嚐」，點知個女仔埋身即博到盡，仲伸埋脷，Fit佬邊講邊笑：「女主角唔小心漏低咗排牙套，我硬着頭皮含住先，等大家唔為意先攞番畀佢。」咁有風度，抵Fit佬咁㩒撈！
撰文：關仁