維基解密近日陸續發佈有美國民間中情局之稱的Stratfor的500萬份內部電郵，Stratfor客仔有私人企業也有政府機構，你肯畀錢就乜情報都想方設法幫你摷番嚟，當中不乏同中國有關的內容，我哋上個星期寫咗部份內容，今日再添幾筆。
內地的人流、資金流近年大舉衝入香港，香港人有形或無形的生活空間，備受擠壓，掀起唔少港人不滿情緒。作為近年獲多家中國國企「走出去」的主要目的地，澳洲當地對於中國同國企的戒心亦係越來越大，維基解密公佈多份關於中國的文件，就充份顯示出澳洲人對中國的人、錢，空降袋鼠國，有幾咁躁動不安。
維基解密截取多封來自澳洲線人，向Stratfor滙報同分析涉及中國國企的電郵，分析對象包括了中鋁（2600）、中國遠洋（1919）等國企。
國企形象差 澳商多徵費
09年7月Stratfor的線人積極為力拓間諜案到內地收風。力拓間諜案源於中鋁母公司收購力拓失敗後，力拓轉而同必和必拓結盟。事後，力拓喺中國的四名員工，包括一名華裔澳洲人，被中央以竊取國家機密罪拘捕，話佢哋喺談判過程中賄賂相關官員，刺探國家機密資料，內地傳媒一面倒指摘力拓。不過，解密文件顯示Stratfor，完全唔Buy中方講法，佢話據知，中方最關注中鋁內部發生乜嘢事，搞到同力拓的談判會陷入僵局，雙方唔肯認輸。線人相信，中方想透過拉人，迫令力拓喺談判桌上投降。
去年8月中發生的中國遠洋扣船事件，中國遠洋唔肯按合約簽訂的船費畀錢，搞到船隻被扣押。線人向Stratfor報告講，有專門入口礦產的買家，都話對中國遠洋冇晒信心，好擔心中國其他航運公司發生類似事件，搞到買家違約。線人仲話，事件進一步打擊中國企業形象，亦解釋到澳洲礦業點解拒絕同中國中小型的買家做生意。佢話，自09年起，中國企業到澳洲買鐵礦同煤礦等，礦業公司每噸收費都會貴幾蚊，就係擔心中國公司違約的風險，估計中國因而畀多咗數以十億計金錢。
唔單止中國企業形象麻麻，佢哋同時亦深信中國政府不懷好意。去年3月有報道指包括總理吉拉德等至少10名澳洲官員的手提電腦，疑被中國黑客入侵。由於電腦連接國會網絡，擔心大量關於政府同商界的資料已經外竊。有線人話，佢哋知道，此事一早有前科，直指中國係幕後黑手，相信源頭是澳洲官員喺訪華時忽視保安問題，外出的時候，將手提電腦遺留喺酒店，搞到被人Hacked。線人話，中國咁做係擺明車馬挑戰澳洲的底線。
爆料線人係華裔參議員
向Stratfor爆料的線人，無論消息可信與否，都反映咗外國相當數量的人對中國的看法。而多次向Stratfor爆料的其中一名主要線人，代號「CN65」，真正身份亦喺解密文件中露了端倪，澳洲傳媒近日報道，原來佢就係澳洲首名有華裔血統的參議員劉威廉（BillO'Chee）。劉威廉於90至99年擔任參議員之後，走入商界，特別係資源業，促成多項M&A，亦成為Stratfor喺澳洲的主要線人。
山頭主義 自保靠外闖
劉威廉向Stratfor的分析亦值得細讀。佢話，中國關於資源入口減少的數字，完全不能盡信。又例如2010年第四季，中國的數據話煤電消耗量減少，但實際上中國興建煤電廠的數字相當多。
劉威廉估計，中國成日發表所謂要做到煤碳自給自足的言論，都係無乜咩實際根據，目標只得一個，就係影響商品價格。
中國企業喺海外的收購，以往一向唔睇ROI（投資回報率），首要關注點是為國家收購資源，為國力擴張。劉威廉講，近幾年，中國國企的收購有唔少變化，大型項目慢慢減少，換來更多小型及分散的投資，有部份甚至係投資於房地產等純粹追求Return的項目。澳洲當地近年經常報道有疑似中國太子黨人物，於當地一擲數億元買豪宅的消息，當地澳洲人亦相當譁然。
劉威廉分析話，其中一種解釋是因為胡錦濤帶領的中央，其實相當弱勢。喺呢種背景下，中共轄下的各種組織，由太子黨控制的國企、部委、甚至解放軍等都行山頭主義，既為擴張自己的勢力，也為自保，於是四出搶購海外資產。