星期二本欄講何車引述之鳳凰對聯，是日早上未夠九點，已收到公關大姐大轉過來之短訊，原來係報界高人叫大姐大轉送俾左丁山嘅，高人晨早睇到「天鳳凰，地鳳凰，天地鳳凰聚鳳凰」之上聯，不假思索，立即有一下聯應對，看官請看是否天造地設：
「天鳳凰，地鳳凰，天地鳳凰聚鳳凰；林山木，山林木，林山山木滿山林」
高人對「古堡好敦倫，敦倫總是倫敦好」此上聯，認為原意牽強，不過可用下聯應對：「新竹影水淡，淡水江邊新竹影」，淡水、新竹皆台灣地方名。
高人何以有此雅興？高人云：「近日政情把人看得烏煙瘴氣，非要一點自得其樂的空間，否則窒息。」唔，新特首競選之事，搞到烏泥滿天飛，不少人睇到眼寃，不知選舉如何收科。左丁山長期閱讀美國總統大選新聞，睇DickMorris（前克林頓政治策略顧問）嘅書，覺得香港式選舉雖是小圈子，因第一次有真正競爭，競選手段已一下子由美國幼稚園程度飛升至大學級，1992年克林頓無甚名氣，由後衝上殺低老布殊總統，民主共和兩黨啲互相抹黑與翻舊賬手法多到無倫，問題係點樣應對而已，政界邊度有聖人㗎，真正聖人就唔會搞政治啦，自認聖人嘅政客一定係大話鬼、陰謀家。
一位讀者Ｋ先生來郵云：
「我只是小市民一個，冇利益衝突，不怕秋後算賬。拜讀一二年二月二十四日之文章提及僭建地下室疑問，由於我的行業關係長期接觸到港島區如淺水灣，舂坎角，赤柱，大潭，山頂等豪宅洋房超過30年，可以說清楚過地產經紀多多聲，（有些地牢做健身室，影院，有些自住，上層出租，可收取15-30萬租金一個月）超過10年以上的3-4層洋房估計有80%以上有加建地牢或天台屋或花園，一早已嚴重失控，如有人向屋宇署或地政署投訴，職員只能在屋外視察，不會被准許入內視察的，所以地牢僭建不易被揭發。
新界丁屋僭建已失控到95%以上，我以旁觀者角度看，解決僭建問題只有來一次大特赦，由建築師簽署證明冇危險情況下，立法規範才能避免政府或會與市民發生流血事件，又可迅速解決問題，不用拖拖拉拉。」
是否可以如此，真的不知道，僭建已由社會問題轉化為政治問題，複雜異常，下屆特首請諗諗辦法。