中港女星湧巴黎睇騷曼玉、Baby遭內地幫胸襲

中港女星湧巴黎睇騷
曼玉、Baby遭內地幫胸襲

【巴黎直擊】張曼玉和Angelababy於香港時間前晚以港星代表身份現身巴黎時裝周睇騷,Angelababy更一日走三場,最為勤力,不過兩位港星在巴黎的風頭卻不敵內地女星李小璐,李小璐前晚睇騷時以一身拋胸晚裝搶鏡,頓時成為焦點。

巴黎時裝周於香港時間前晚有不少重注碼的時裝騷登場,包括Dior、Lanvin及MMM等,吸引大量港星和內地女星睇騷爭艷,港隊有Angelababy連走三場騷及國際影后級人馬張曼玉欣賞Lanvin騷,內地軍團則空群而出,包括張雨綺、李小璐、霍思燕和林鵬現身捧Dior場,姚晨則捧Lanvin場。

張曼玉一向是巴黎時裝周的常客,前日捧她的心頭好Lanvin場。 CFP圖片

Baby一日連踩三場騷,最為勤力。

一身「蛇裝」的姚晨與泰達史雲頓(左)合照。 CFP圖片

Baby與潮人韓火火(左)齊齊成為MMM時裝騷第一行的上賓。

Baby堅拒艷遇

Baby先以皮草外套,白色tee及黑皮短裙的打扮現身Dior騷,卻被同場身穿白色低胸裙的李小璐拋胸搶鏡,李小璐性感之姿橫掃全場,風頭蓋過以貴婦造型亮相的同鄉霍思燕和張雨綺。
Baby透露法國之行會逗留一個星期,她說:「有少少工作,同帶埋媽咪同朋友嚟玩。」問男友黃曉明有否同行,她甜笑說:「冇,工作緊要,自己都預咗一筆錢同媽咪去shopping,自己又要設計時裝,所以都鍾意睇騷攞靈感。」問她會否怕在巴黎有艷遇?她即說:「唔會。」

內地女星張雨綺一身皮草貴婦造型現身巴黎睇騷。

霍思燕一身黑色造型睇靚衫。

姚晨黐實泰達

此外,Lanvin主帥AlberElbaz入主品牌10年,前晚舉行時裝騷和派對,張曼玉、Baby與內地潮人韓火火、內地微博女王姚晨、謝茜嘉艾芭(JessicaAlba)及金像女配角泰達史雲頓(TildaSwinton)均有赴會,一身蛇圖案打扮的姚晨更化身小粉絲,拉着泰達史雲頓合照。可愛的AlberElbaz在謝幕時高唱了名曲《QueSeraSera》幾句,引得全場大笑拍掌。
採訪:顏英儀
攝影:葉君海