做生意逆水行舟，不進則退，繼時裝品牌思捷（330）由天堂打落地獄後，意大利時裝品牌Benetton都難逃一劫，俾近年冒起嘅Zara同H&M㩒住嚟打，股價更一沉不起，所以大股東Benetton家族近日宣佈全面收購在外流通嘅股份，準備喺米蘭交易所除牌，意大利時裝界都要改「潮」換代。
呢個歷史悠久嘅品牌最終都敵唔過經濟同潮流變遷，據外電所講，公司嘅收入喺近10年間停滯不前，相反競爭對手Zara嘅母公司Inditex比佢高出幾倍。Benetton市值由2000年嘅40億歐元（約410億港元），跌到舊年得番約8.5億歐元（約87億港元）。公司話希望透過私有化，喺短期同中期重組上有更大自由度。
希望呢個曾經係八、九十年代備受追捧嘅品牌，好似佢賣啲衫咁，重現色彩！