金融海嘯之後，全球都話要加強風險管理，加上近年市場有唔少新事物，好似黑池交易，監管機構當然要睇實，香港證監會上個禮拜五就宣佈成立中央風險管理組，負責風險管理同埋策略規劃。
通常魔鬼藏在細節中，尤其啲高風險嘅嘢真係要金睛火眼到實，證監就搵咗瑞信前董事總經理兼亞太區合規主管比妮．諾藍（BenedicteNolens）擔任，今日履新。
諾藍小姐喺瑞信時掌管投資銀行、私人銀行同資產管理部嘅監管合規事務，相信對風險呢家嘢都非常了解。呢個新小組會直接同CEO歐達禮滙報，歐達禮話，呢個小組有助評估本地同海外存在風險嘅重要性同影響，方便證監做嘢，而呢啲因素往往都相當複雜。監管機關同市場上嘅金融機構一向都要鬥智鬥力，今次外聘大將出任實屬正路，但諾藍由被管一方，轉投管人嘅一方，又唔知慣唔慣呢？