【本報訊】「曾蔭權，下台！下台！下台！」昨天遊行隊伍中，不乏曾經參與03年倒董50萬人大遊行的市民；事隔八年再出動，不少市民表明不值曾蔭權的所作所為，必須用行動表達不滿，踢走「曾貪官」。
從事保險業的袁先生，上一次出來遊行是03年上街倒董；眼見身為特首的曾蔭權竟然接受富商款待，他氣憤難平，實行倒董過後再倒曾。袁先生責曾蔭權學足內地的貪官文化，令香港廉潔形象受損，「佢有少少似國內嘅貪官咁樣，因為呢種文化以前唔會喺香港出現㗎，佢真係有樣學樣，而呢種意識形態係值得我哋所有、甚至每一個香港人企出嚟反對。」
希望有權揀特首
他斥曾蔭權在立法會的道歉「虛偽」，絕對「唔收貨」，諷刺指：「呢啲戲我都識做啦，你食完、拎完，出嚟喊兩句，你覺得可以冇事咩？我認識有啲公務員，只係坐一次公家車返屋企，因為順路，都俾廉署捉咗佢啦，更何況特首坐完人哋架飛機、食完人哋餐大餐。」他強調曾蔭權必須下台。
在科大教心理學的譚先生昨亦與女友陳小姐「拍拖」遊行。雖然今次遊行路線較03年倒董更長，但他相隔八年後決定再行出來，「過去幾年都冇參加遊行，因為大家訴求唔一樣，但今次明顯目標清晰，就係要曾蔭權落台」。
他批評現時小圈子選舉制度，未能令貪腐的曾蔭權下台，小圈子選舉更是一場鬧劇，「候選人我哋冇機會揀，又冇機會踢佢落台；做緊特首嘅有咁多問題，佢只喺一句道歉就算；希望將來有普選嘅時候，我哋可以決定到邊個做特首，佢有做得唔啱嘅地方，我哋可以踢佢走」。