日本搖滾班霸L'Arc~en~Ciel，前晚於亞洲博覽館舉行第二次香港演唱會，全場爆滿。對香港情有獨鍾的L'Arc，由頭到尾都以廣東話與歌迷溝通，雖唔鹹唔淡反而令fans笑爆嘴，如將廟街講成妖街，演唱會中他們更出動送蕉，又拎於廟街購買、港人酷愛的憤怒鳥玩具上台。
曾於08年來港演唱的L'Arc~en~Ciel，相隔約四年再會港迷，依然吸引近10,000歌迷坐爆亞博館。今次是L'Arc成軍20年來舉行最大型的世界巡迴演唱，他們挑選了香港作第一站，認真畀面。香港的L'Arc迷也十分忠心，有些提早八小時去到會場搶購紀念品，有些拉着大banner到場，更有瘋狂fans在身上紋上主音hyde的樣子。
獻唱名曲甩轆
隨着整個舞台般大的巨型videowall播放映像，L'Arc以一曲《荊棘之淚》揭序幕，歌迷見到hyde現身，做出扭動蛇腰的招牌舞姿，已不停瘋狂喪叫，唱完第三首歌《GOODLUCKMYWAY》後，hyde就開始講一大堆廣東話，他大叫着說：「多謝，香港你好！」之後又用手遮着臉及彎身，偷看貼在喇叭上的貓紙，再說：「好想見面，準備好未？」港迷當然亦繼續狂叫回應。
當hyde講完廣東話，隨即唱出名曲《HONEY》，掀起首個高潮，可惜唱了幾句後，卻突然甩轆，hyde叫停然後與結他手ken談了一會後再開始，看來是樂器出了問題，hyde尷尬地笑用英語說：「唱第二次！」不過，hyde之後一直落力演出唱到又跳又跪地，加上舞台上配襯着噴火及爆破等效果，fans全不介意他們甩轆，唱到《MyHeartDrawsADream》、《你》等歌曲時均與L'Arc一起大合唱。
廣東話講唔停
至於全隊最搞鬼的ken，又出來搞笑，他亦以廣東話說：「香港嘅朋友大家好，我今日去咗行女人街，見到好多得意嘢，仲去埋廟街，又見到好多好特別嘅嘢。」不過，ken將廟街說成妖街，認真搞笑。他續說：「我仲買咗禮物送畀hyde。」之後拿着黑色膠袋送給hyde，當hyde拿出來時，竟然是一盒憤怒鳥玩具，可惜看來ken買錯了老翻，他又用英文說：「周圍都是憤怒鳥，你們憤怒嗎？」全場fans又再起哄。
到了安歌時，hyde又再講廣東話：「多謝香港嘅朋友，我愛你，好開心。」更大送飛吻，低音結他手tetsuya則拿出香蕉來咀，咀完之後擲落台下，令fans展開爭蕉大戰。
中台兩地被譯成「彩虹樂團」的L'Arc，最後唱出「校歌」《虹》，更不停放出白色羽毛，吹向觀眾席，製造浪漫場面，tetsuya亦用廣東話送上一句：「下次見！」作結。
採訪、場外攝影：阮瑜
