兩會北京召開，梁營悍將劉夢熊四出放風，指中央已欽點振英登位，唐營快快投誠。今日香港傳媒已淪落到甘為劉所利用，將「放風」作頭版新聞，實在慘不忍睹。京城呢幾日飯局頻頻，金魚胡同馬會會所及旁邊大董烤鴨乃熱門地點，派幾個狗仔隊收料，可信度定必比梁營放風高。
真正梁振英 田少搞唔清
田北俊在京一番評論說話，可圈可點，原文照錄。「新認識他的人會欣喜，但舊人就會質疑，哪個是真正梁振英。」田北俊這番話的背景是他寧投白票，也不投振英。
因他認識梁振英多年，對他感覺與公眾有不同。振英呢幾個月打了一場相對漂亮的選戰，正面負面戰略收放自如，適時到位，將唐打到變真正豬頭，所以民望高企，民調節節領先。呢個叫做新梁振英，受巿民歡迎。
舊梁振英係點？大部份同佢共事過嘅人都好有保留。田北俊在行政會議共事，地產大孖沙及代理人，不少同佢在預委會、籌委會共事。
咁多年都睇唔清一個人，而且田少、大孖沙呢班人個個挑通眼眉，在建制陣營打滾多年，至今仍死都唔Buy振英，大家值得深思。
部署多年 責任從不上身
原因我認為係「信唔過」。自基本法諮詢年代至今30年，在大小政治鬥爭中，振英都有參與而又完全不上身，對敏感政治問題，鮮有公開表態。同期譚惠珠、方黃吉雯、鍾瑞明、劉漢銓，個個有政治損傷，大部份退下火線。范太、曾鈺成則靠選舉再生。
一個人小心謹慎幾十年保護自己形象，確保冇痛腳，將30年來多次政治爭鬥的責任推得一乾二淨，一切為了做特首。齋係呢一番心思同部署，都好驚人，亦好陌生，太唔似香港人作風。
田北俊對振英的陌生感，是經年積累而成，今日他的誠懇真摯，友善正直，是近月為了選舉才建立。
香港的權力精英，不論政見派系，大部份對振英都有這種陌生感，也由此產生恐懼。范太對近期有系統有組織用醜聞打擊唐與曾，亦感憂慮！
振英的政治面目及作風，似哪一種人？
添馬男