劉德華、葉德嫻（Deanie）昨日繼續宣傳新戲《桃姐》，將為人父的華仔，在台上對尿布甚有研究，又特別照顧小妹妹，盡顯父愛。雖然華仔在台上當眾取笑Deanie是大鄉里，但他被記者追問生女問題時，Deanie也出口為華仔擋駕，母子情深。
劉德華和葉德嫻昨日在觀塘apm出席「點滴關懷展光輝」及宣傳新戲《桃姐》，現場搭建華仔戲中角色Roger的屋企，展出了華仔及Deanie憑《桃》片獲得的獎項，以及Roger小時的物品，如孭帶、尿布及睡衣等，獎項及展品會展至本月25號，好等市民近距離欣賞。
恨攞金像獎
司儀在台上問Deanie是否最喜歡威尼斯影后的獎項？華仔即說：「唔好咁崇洋，其他都好犀利，我哋等緊香港嗰個。」Deanie則說：「個個獎都有感覺，對威尼斯嗰個特別有，因為從來冇參與過，今次係第一次。」華仔即取笑她說：「幾鄉里。」Deanie回應道：「係呀，我真係好鄉里，所以想去學吓嘢，今次去到感覺好驚喜，個獎真係好重。」
將為人父的華仔，在台上不忘拿起Roger的尿布，並大讚尿布越用質地越好，司儀指華仔這方面有研究，華仔即尷尬放下尿布說：「我哋講第二樣嘢。」之後華仔與小朋友玩遊戲，明顯特別照顧小妹妹，又拖又摸頭，盡顯父愛。華仔在現場大賣廣告，表示推出了新書《我的30個工作天》，是他拍《桃》片時，30日遇到的事，工作人員覺得有趣便替他出書。
愛老又愛嫩
之後華仔接受訪問，被問是否對尿布特別有興趣？華仔即說：「都講咗，個話題唔講喇。」提到他對小朋友份外照顧，他又說：「我不嬲係咁嘅，由細好鍾意照顧小朋友同老人家。」再問華仔之後會選用尿布還是尿片，Deanie即護華仔笑鬧記者：「你仲問？」之後又為華仔打開話題：「可以問吓華仔本書內容各樣嘢。」
採訪：張俊銘
攝影：陳志嵐