曼聯中場費查因為潰瘍性結腸炎今季提早收「咧」，呢個病都幾「擇使」，踢踢吓波搞肚痛真係唔知點算好。不過呢位悍將冇就此屈服，一路都有研究唔同方法去對付個病，包括試吓接受催眠。25年前港產片經典《精裝追女仔》，爛口發被催眠咗之後都變到公子發，呢個都不失為好方法喎。
「乜方法都會試吓」
潰瘍性結腸炎令到費查成日會大腸唔多妥，早排佢接受醫生建議無限期休養，但依然冇放棄過。費查話最近試過好多唔同方法，其中包括催眠治療，佢話：「我家情況都幾好，一路都有接受治療，同埋聽醫生嘅意見，乜方法都會試吓，調節飲食同催眠等等都有。其實家都未有幾時康復嘅時間表，不過我嘅目標係喺下季復出。呢個病好難完全斷尾，所以更加要努力諗計去面對，等我可以繼續踢波。」
雖然佢冇講到治療嘅詳細步驟，但求大俠估用得催眠好有可能都係幫佢唔記得腹瀉嘅感覺，可以全心全意去比賽。費查近排除咗接受治療之外，都有繼續接觸足球，前輩史高斯復出之後，留低既預備組助教職位就由佢頂上，做禾倫祖斯嘅副手。即使費查復出，到時可以踢幾耐頂級聯賽始終都係未知之數，暫時做吓助教吸取領軍經驗，第日多門手藝都唔錯。
費Sir大讚沙夏回勇
費查最快要到下季先可以復出，曼聯喺星期日作客熱刺呢場大戰，領隊費格遜就只可以靠目前兵源頂住先。展望呢場大戰，費格遜就點名指舊部沙夏會係最大威脅。沙夏曾經效力曼聯4季，期間贏咗兩次英超錦標；今年1月由愛華頓轉投熱刺之後鹹魚翻生，費格遜話：「沙夏去到熱刺之後回復番佢最高水準，左右腳皆精，仲有高空威力，喺前鋒線相當難搞。」
另外，曼聯噚日啱啱喺Facebook更新咗專頁，畀球迷多一個同球會互動嘅平台，仲提供最新熱門話題可以進行網上討論，有興趣嘅紅魔球迷不妨去睇吓。