03年聽着Shine的《東浦日和》、由旺角吻到樂富再出將軍澳的戀人，不知散了沒有；今天，將軍澳線已經開到康城，也應驗了《燕尾蝶》預言的：摘去鮮花，然後種出大廈。變化原來只是十年間的事。
情人在頸上留下吻痕，也許有些會白頭到老，也許有些會中途下車，如Shine。06年，他們跳車了。拍戲拍劇北上搵人仔，就是不唱歌。從沒試過如歌曲《鼎鼎大名》般的Shine，從此在樂壇消失。幸好因為黃偉文「撮合」，Shine終於短暫重組，稍後還將舉行十周年音樂會。但他們說：「冇宣佈解散，就唔係拆夥。」 撰文：李珮洳
組合Shine06年暫別樂壇，在大家心目中他們應該是「已拆夥」，連維基也這麼寫：「二人於2007年2月初宣佈作個人發展，Shine正式拆夥。」但據官方說法，因為他們沒有宣佈解散，就不是拆夥。
Shine「人間蒸發」（想不到更合適形容詞）後，一個拍劇、一個拍戲，徐天佑說：「係喎，我哋真係好似乜嘢都冇講就走咗去，諗番都覺有啲不負責任，好似official都應該要同大家講聲，嗰時覺得我哋都會一齊出function，都會見到我哋兩個㗎啦。」
原來連講分開，也沒一起傾過，天佑續說：「首先係我同經理人私下講，我唔想唱歌啦，因為合作耐咗，兩個人已經冇乜火花。」黃又南接口道：「我都係自己同經理人傾，我話我想拍戲。其實當時只係想停一停，諗一諗。」
回味紅館歡呼聲
今年2月11日Shine再踏紅館，再次唱出黃偉文填詞的首本名曲《祖與占》和《燕尾蝶》，天佑說：「出場前好緊張，好口乾，係咁飲水，以前緊張就成日去廁所。」當晚又南負責彈結他，之前先提起耳機，偷聽現場反應，現場的歡呼聲很熱烈，二人都放心了。天佑回味說：「每個moment都要留意吓，所有嘢都好記得，好清晰好細緻，以前冇細心欣賞過啲觀眾，次次都係上台喇，唱完就走，接住去下一單。」
唱了三晚之後，又南又要飛了。回來時演出片段網上點擊率已逾50萬。又南看完了剪報，回房坐在椅上彈結他，一邊自轉：「仲有嗰種mood喺度，仲開心緊。」沒想過反應會這麼好。
今年是Shine十周年，天佑透露之前有構思過十周年會與歌迷聚會，聚會的形式可能是一邊燒烤，接着唱幾首歌。可是YY騷的爆炸力實太厲害，很多人都期望樂壇再有Shine出現。天佑說：「好感動，感覺係人哋想見到你，好期待，好似細個希望見到玉置浩二出碟咁，家自己成為被期待嗰個。」十周年騷，是會舉行的，但不會出新碟，亦不考慮簽唱片公司，只計劃若有新歌就放上網。總之，細節未定。因為一切突然來得太快。
謝歌迷不離不棄
離開六年，其實不算太久，但也有歌迷從成軍當日算起，所以剛好十年，並在網上留言道：「十年前，我們還沒有經濟能力支持你，現在可以了，你們卻消失了。」其實現在的90後fans，已經很有米。天佑又說：「有次喺咖啡店開會，有幾個小妹妹、唔夠18歲，過嚟話你哋出嚟唱歌啦，我哋會去睇。」講到Shine好像Beatles那個年代，他們笑道：「其實我哋都係80後啫，83年出世㗎！」
搏命銀不停病
「唱歌+做馬騮戲」是一個套餐？何時見過要莫華倫、麥當娜去攀石？香港樂壇根本是個畸胎。天佑說：「不停出商場騷，或者唔同活動，聽日唔知點解要去攀石、去爬山。其實我唔想攀石，我想唱歌。」他強調不是不滿以前的工作，只是有時會不明白背後的意義。
由早到晚要出席四個活動，有時根本不知自己做甚麼，又南負責解說：「一日跑四個活動，又係唱呢兩首歌。做完晒先有四個鐘去錄音，但根本唱唔到，太攰。」當年的Shine每日麻木地做，工作，生病、再工作，似乎已變成一條方程式，天佑笑道：「試過夜晚12點錄音，朝早6點開戲，嗰陣拍《五個嚇鬼的少年》，我根本唔知「自己做緊乜嘢。」
「以前唔珍惜機會」
到二人分開搵真錢，依然是不停病，不停做。早前於內地出席記招暈倒的又南苦笑：「我試過同一時間拍兩部戲，上海拍《宅男總動員》，橫店拍《秋瑾》。早班拍《宅男》，坐三個鐘車去拍《秋瑾》，再坐三個鐘返去早班拍《宅男》。一個禮拜，我唔得啦。去上海吊針、杭州吊針、橫店吊針，好似返屋企咁，司機拍醒我同我講到喇，你落車吊針啦。」
以前太忙，所以有怨懟；現在，錢總算賺到，但又懷念從前，又南說：「收工返酒店嗰陣好攰，好自然諗起以前同歌迷互動嘅畫面，其實係好開心。以前唔知道珍惜、唔需要任何機會，因為每日都有機會；大個先發現原來我係好需要機會，要得到機會，係好難。」
儲老婆本奶粉錢
又南的父親04年生意失敗，父債子還，他說：「你畀我揀多一次都會去幫。爸爸好唔開心，覺得累咗我。其他後生仔可以出去玩，我就不停做，或者成日匿喺屋企，因為冇錢去玩。筆債09年還晒喇。爸爸家做司機，佢比我更樂觀，亦推動我更努力工作。」
「買到樓先生仔」
好像經歷了千山萬水，但Shine二子今年只是28歲。男人30而立想置頭家，但他們跟很多80後一樣——冇樓。已有女友、自稱是愛情路上的小朋友的天佑說：「我都係努力中，希望有能力買到樓先生仔。個B靠晒你，但原來做爸爸嘅都踩鋼線、等緊飯食，咁好危險。我知道創作搵唔到食，但有啲嘢我係想做埋先。」
又南較傳統，想30歲結婚，最理想是妻子不用工作，他說：「努力儲錢，人開始大，思想會穩陣啲。」幸好又南剛甩拖，要等他的那個她，應該還未出現，慢慢捱吧。
髮型：LouisTse（P.O.PHairdressing）
化妝：HernyTse
服裝提供：Hare（CollectPoint）
