【記者呂麗嬋報道】中銀再推紀念鈔，炒到三萬元天價！承接好旺角一半買賣、被稱為全港最年輕錢幣店老闆的陸嘉瑋見怪不怪。由97女皇頭郵票，炒到08奧運鈔。16歲賺第一桶金，也試過入錯市炒燶、蝕過百萬！26歲已擁15年炒齡。少年炒神謂「由輸開始」，自信可捉住泡沫，笑到最後。
「今日中銀鈔乜價位？」過去一星期，好旺角商場成為炒鈔風眼。「呢度係股市，秒秒鐘幾十萬上落！你睇出面班阿叔，日日朝十晚六，睇住個價位，當正呢度係金魚缸！」說話的正是陸嘉瑋。
11歲已在好旺角打滾，嘉瑋與太太夫妻檔搵食，太太坐鎮一樓樓梯口旗艦店，他就長駐三樓分店。
商場內，不少人都說嘉瑋所開的「匯寶閣」，與北京炒賣市場大戶密切連繫。小伙子直認不諱，不過就狂呻，全城熱炒中銀鈔，內地莊家贏晒，如他一類夾在中間的艇仔，最傷！
對於炒，嘉瑋確是專家。97回歸，他還是小六學生，「個個炒女皇頭郵票，我收錢去郵政局做排隊黨」。03年沙士，他中五畢業，愛集郵的他，炒出第一桶金，決定以10萬本金，在好旺角創業，主力炒他最愛的郵票。
分散投資有成有敗
他記得，內地當年發行小版郵票，他第一時間衝到廣州入貨，十元八塊成本一張，眨眼升到過百，心雄，跌到70，以為勢好，會再升，大手追買，點知再跌，轉念之間，已血本無歸。
創業功敗垂成，嘉瑋跟做工程師的爸爸做學徒，打了他第一份、也是至今唯一一份受薪工作，未夠一個月就辭了職，還是炒賣容易。剛好有朋友想開舖，他再戰好旺角，但今次學精，郵票、鈔票各自炒，分散投資，有成有敗。有同行笑他身家以千萬計，他說炒賣生涯都是賬面黃金，無咁多！