為紀念加入樂壇25周年，達明一派下月20日起會重組喺紅館開「兜兜轉轉演演唱唱會」，早前佢哋公開發售門票雖然撞正美國天后LadyGaGa同日發售，但佢哋兩場門票都迅速售罄，之後東亞即決定加開22日一場。
歌詞太敏感
而達明為了今次個唱，早前將舊歌《排名不分先後左右忠奸》譜上新詞，並改篇成新歌《排名不分先後左右忠奸2012（你chok定唔chok）》，新詞由小克、梁柏堅、黃耀明三人包辦，不過達明首歌上載去新浪微博短短幾分鐘就被「河蟹」，相信係因為歌詞中充斥着內地敏感人士嘅姓名。
今次首歌佢哋唱盡香港時下最熱門話題，當中不乏敏感字眼如鄧小平、蝗蟲、孔慶東、華叔（司徒華）、胡錦濤、溫家寶、習近平、澤叔（江澤民）健壯等，就連近日熱爆全港嘅特首選舉，佢都有句應景歌詞寸唐英年話：「HenryTong仲僭建酒池肉林。」
雖然首歌家YouTube冇被「河蟹」，但黃耀明（明哥）對新歌被內地刪除就大感無奈，佢話：「河蟹咗，冇所謂，家資訊科技發達，要聽嘅朋友一定有方法聽到，加上新歌內容跟22年前嘅構思一樣，香港人耳熟能詳，一於一齊chok好香港。總之希望香港保持一國兩制，河水不犯井水」。
