樂壇天后王菲今年真係頭頭碰着黑，年初出席春晚節目唱到走音，早前喺重慶開演唱會又發生塌台事件，好彩呢啲嘢冇影響阿菲心情，日前佢仲畀傳媒影到約埋兩個好姊妹喺北京一個商場shopping買內衣褲。
年屆42歲嘅王菲雖貴為兩女之母，但身材仲keep得好弗，當日見佢着咗件黑色羽絨褸襯紅色貼身褲同雪靴，雖然稱唔上係潮爆打扮，但素顏現身嘅佢依然好sharp、好靚，唔少途人一眼就認得出佢。
潮玩微信
阿菲先同朋友入咗一間專賣內衣褲嘅舖頭，雖然唔係名牌子，但店內部份貨品有減價，見阿菲睇完吊帶內衣再轉攻喱士內衣褲，唔知係咪想揀啲sexy款吓老公李亞鵬開心，期間佢仲嘴嘟嘟好有少女情懷，似乎揀得非常開心。買完一輪心頭好，三個女人之後離開商場，一向係微博迷嘅阿菲，最近仲潮玩微信，見佢同朋友沿途手機不離手，王菲仲不停對住部電話講嘢，就知佢有幾着迷。