蘋果波神放大假休息數天充電，本欄今日由小弟暫代，希望各位蘋果波神擁躉見諒。小弟為港產片老牌粉絲，唔少經典電影都翻睇又翻睇；好似講濠江賭王發跡史嘅《新哥傳奇》，更為百看不厭。
《新哥傳奇》當中就有唔少經典對白，好似「新哥」自細就領悟一個道理：「賭錢從來只有做莊係穩贏。」而喺新哥當年賭場剛開張時，就發生一單趣事；話說有名大有錢佬，攞住1,000萬現金想同新哥對賭，當年1,000萬已經係天文數字，個有錢佬就話想同新哥賭一鋪，新哥贏就贏咗個1,000萬，輸就賠間賭場畀佢。結果，新哥都係拒絕，事關經營賭場唔係只求一朝一夕，而係希望細水長流，係莊家優勢慢慢侵蝕賭客資本。
莊家一定贏呢個道理，令「濠賭股」呢幾年成為香港股市新貴；星期六、日澳門大街小巷人頭湧湧，想叫部的士難過中圍骰，就知濠賭股仲好好景。不過，近期大市回升，濠賭股稍為落後，反映現象係澳門啲賭場開得太多，行內競爭激烈咗，變相毛利都要下降；酒店間各出優惠拉客，就知唔係咁易做。
中國大陸表面就禁賭，但其實都有合法莊家，佢就係第一視頻（082）。表面上第一視頻係做手機網絡遊戲生意，其實公司另一個主業，就係大陸好流行嘅福利彩票，當中有涉及足球戰果嘅球彩，又有時時樂等；眾所周知，彩池制博彩莊家基本上穩賺不賠，收晒賭友嘅投注，抽番若干比例後派番出去，唔怕你中彩，最怕你唔賣啫！上年年尾香港出現小股災，第一視頻跌到去7、8毫子，小弟錯過入市機會，轉個頭已經爆升番上一個幾，真係嘆句呢啲錢唔係我賺。不過，大家都可以繼續留意佢，趁跌番一蚊樓下，入得過。
足智彩係獨市生意，加上稅務高，水位就一定冇濠江間公司咁好；香港人除咗嘆句無奈，就只好盡量慳注碼，睇準成晚落一、兩場就算。唔係好似收費電視直播澳職個幾位主持咁，一場波買走地走足幾注，就算畀你中三口輸兩口，隨時都輸水位，莫講話輸多贏少。周六重心簡單兩場波，曼城勝[-2]，同埋巴勒莫和AC米蘭。曼城主場威力，唔使我多講，歐霸盃亦唔使點牽掛，保頓走埋加利卡希爾，等俾人炒。
牽牛
今日重心推介
熱選
曼城勝[-2]（1.8）
冷選
巴勒莫和（3.35)