黑機一向是攝影人至愛，全因那份古典味，更因為黑色感覺低調，將彼此距離拉近，更易捕捉真摯一刻。一年前，富士X100驚為天人，典雅造型加大片幅感光元件，令懷舊發燒友趨之若鶩。事隔一個寒暑，港版加碼推出限量黑魂版，全黑骨架將X100古典魅力推上更高峯，在中環石板街流浪SnapShot一整天，攝與被攝，同樣滿足得難以言喻。
記者：韓繼聰
攝影：潘志恒
Model：CC@InterplayWorkshop
查詢：富士攝影器材（24063225）
眾望所歸 黑色留低
在貪新忘舊的數碼相機界，試問有幾多機可以賣足一年，依然搶手兼價錢企硬？不停出靚爆新色，仍然有本事引你買「舊機」？富士X100真可謂奇葩。繼開價近兩萬，甚有Hermès版M9味嘅真皮啡機及白機，富士又再出手，玩攝影人最愛的黑魂版。其實復古相機一向以全黑主導，就連古典大哥Leica，都係以BlackPrint示人，今番X100換上全黑衣裳，可算眾望所歸！
不少專業攝影人都覺得，全黑相機比較低調，易於隱藏，能更容易在不知不覺間拍照，影出最真摯自然的表情、動態和感覺，特別適合街頭「浪攝」。今次呢款特別版依舊玩限量玩矜貴，超大盒包裝比之前「香港特別版」更靚更誇，感覺豪華霸氣！套裝包括一系列黑魂配件：真皮機套、遮光罩、鏡頭接環及保護濾鏡等，加上跟機限量版證書，實用同收藏價值兼備。
相機界熱吹復古風
其中一位玩家梁先生，一年前已被X100濃得化不開的復古味吸引，機一出便即買。「自己一向愛玩古董相機，完全被X100嘅外形同操作方法迷倒。今次出全黑版，當然更喜歡！」梁生一面把玩着對咗一年都無厭倦感嘅原色X100，另一方面又不時對我手上的全黑版流露出饑渴眼神，同樣愛古典風的我，完全明白佢嘅掙扎苦惱。「時裝界長年玩復古，其實相機界亦然，好似RicohGRD系列、OlympusEP-1至3、以及最新OM-D、PentaxQ，全部玩復古風都大受歡迎、受潮人熱捧。而富士的X系三傑：X100、X10及X-Pro1，更係將呢股風潮玩得淋漓盡致！從佢哋嘅受歡迎程度睇，復古風喺相機界一定有排玩。」
