利物浦球員又衰種族歧視？話說紅軍嘅西班牙門將連拿（圖）喺一個保險廣告度，去非洲一個部落探險，由於連拿（Reina）喺西班牙話係解做皇后（Queen），所以佢就俾個族長捉咗去做老婆。個族長喺廣告內嘅對白係咁：「我係皇帝，你係皇后。」我求大俠睇過個廣告，覺得幾得意同埋好笑，但係英國壓力團體OperationBlackVote就認為個廣告帶出黑人係愚蠢、落後同埋同性戀等負面訊息，擺明係種族歧視黑人。任何事物都可用不同角度去睇，OperationBlackVote要將個廣告演繹成咁，真係冇佢哋辦法。我求大俠只可以講句，如果OperationBlackVote睇過歷蘇主演嘅《上帝也瘋狂》，肯定拆天都有。