為了印花和名牌煲，一個月來充當排隊黨的婆婆和師奶終於到了「收成期」，記者追訪到一名住在葵興邨的50多歲師奶，排了近一個月，買了價值一萬三千多元的奶粉，終於儲夠220個印花，換了一個零售價1,100元的單柄鍋連蓋。
「辛苦咗二十幾日」
「辛苦咗二十幾日，一儲夠印花即刻去換，仲第一時間攞嚟用，點知一用就呻笨！啋，個煲柄辣手㗎！」她說一般煲的手柄位都有塑膠套用來隔熱，但德國Thomas不銹鋼煲就沒有，「老實講，我哋啲屋邨師奶點會成日帶住個隔熱手套煮嘢呀，我洗碗都懶得用手套！」她說已將辛苦得來的「貴煲投閒置散」。
雖然如此，仍有不少師奶對德國名牌煲趨之若鶩。劉太去年尾開始頻頻往惠康購物，但到現時仍差30個印花才能換購一個價值850元的煲。「我都好辛苦儲呢啲印花，我都想人哋畀啲我！」她說為了印花，不介意排隊買奶粉，皆因這煲「鋼水靚」，是師奶的心頭好。「呢啲靚煲唔可以用猛火燒，一定要用中慢火慢慢燒，慢慢燒手柄位唔會好燙手，係佢哋唔識用啫！」記者：黃江奇