蘋機會：DC隔空掟相　20秒即睇

睇劉謙隔空飲水、隔空取物技驚四座，但始終都係掩眼法嘅魔術嚟啫。今日Sony玩嘅Magic就實牙實齒得多，最新Cyber-ShotHX30V，內置Wi-Fi傳送，唔止可以將靚相即時隔空掟落手機，連平板、Notebook甚至屋企部電視都可隔空連接，使乜將記憶卡抆嚟抆去呀！

記者：陳國輝
攝影：林栢鈞

通食無線裝置

查實坊間有唔少具備Wi-Fi傳輸嘅Accessory，但講到內置喺DC，仲能提供畀所有Wi-Fi裝置使用，都算少見。當你用HX30V影好相之後，㩒個Menu掣就可以啟用隔空傳相功能，以Wi-Fi無線連接手機之類嘅裝置，拍完嘅心水靚相可即時掟出去，全程只不過約20秒就搞掂。
除指定照片，你仲可一次過揀多張相掟落Wi-Fi裝置，需時幾耐，就要視乎Wi-Fi訊號強弱。試玩當日，我哋就以手機、平板以及電視作示範；三類裝置之中，LCD-TV過相速度較慢，但如果你屋企用緊Bravia系列，佢就提供多一項幻燈片播放模式，畀你一邊睇靚相、一邊播放背景音樂，好正！至於過相最快算係手機裝置，唔止支援AndroidOS，單撈專用App之後，連iPhone亦可變成隨身電子相簿，好方便。

■透過Wi-Fi，你可選擇多張照片一次過傳送，手機、平板乜都得。

■按鈕佈局雖無乜新意，但勝在玩慣細機嘅人，一摸就懂。

■嫌閃燈唔夠火力，加埋光學防手震，影夜景就無難度。

■設有miniHDMI，短片可接駁至高清電視欣賞。

鏡面超薄玩襯色

發佈會中TX系列都有新機，其中感覺勁Fancy嘅TX200V，表層採用鏡面物料，而1,820萬像素鏡頭以及閃燈等「礙眼」配置，亦通通隱藏於「鏡」內；反轉背除咗見到紅、藍或銀色嘅邊框，屏幕還採用輕觸式設計，全程操作近乎一篤走天涯，減少按鍵佔用嘅空間，齋睇賣相，已經相當靚仔吸引。
想再誇啲，仲有體形勁Slim嘅TX66，號稱光學防震DC中全球最薄，只有12.2mm！計我話，佢好色嘅一面更甚得女仔歡心，提供紫、銀、白、粉紅和金共五隻色，還追加「水彩畫」以及「插圖」兩款Effect，玩味甚濃。