千億富豪鄭裕彤近日宣佈退休，正式交棒給二代三代，逍遙人生。彤叔孫女、鄭家純女兒鄭志雯將於本月11日嫁給鋼鐵大王龐鼎元孫兒龐建貽，將於自家地頭會展筵開百席宴客。彤叔昨日如常返新世界，他告誡未來孫女婿要聽晒老婆話、切忌沙沙滾。
三月旺婚嫁，名人富豪二三代喜事陸續有來。3月20日Neway細少薛嘉麟娶諸葛紫岐，3月29日全國政協常委楊孫西兒子楊華勇結婚，而最哄動的，要數311的鄭裕彤孫女鄭志雯和鋼鐵大王龐鼎元孫兒龐建貽的富三代世紀婚禮。
讚孫女婿100分
日前宣佈退休的彤叔，昨日如常到新世界返工，更坐到5點收工時間才離開。彤叔對孫女鄭志雯結婚，一聽就眉開眼笑：「梗係開心啦。」送甚麼禮？彤叔說：「佢要乜都得，送首飾啦，梗係周大福首飾啦！」未來孫女婿龐建貽門當戶對，名門之後，彤叔反而欣賞孫女婿人好，又對孫女好：「100分，人好好，梗係要對老婆好啦，聽晒老婆話。」切忌拈花惹草？彤叔即說：「梗係唔好沙沙滾啦！」
彤叔退位，由鄭家純坐正主席位，有傳和鄭家純育有子女、高院前大法官王見秋女兒王穎妤，將會加入新世界，彤叔聞言即收起笑容：「唔好問我，我唔知。」至於唐英年和梁振英的特首之選，他則表示自己不是選委，不作評論。
新郎阿姨心急
31歲的鄭志雯（Sonia）哈佛畢業，現時主力管理新世界集團旗下的酒店業務；35歲的龐建貽（Paulo）則自立門戶，開拓紅酒王國，代理過百國際名牌紅酒。兩人結婚當日會先在聖約翰座堂行禮，在會展擺酒。新郎阿姨陳燭光前晚在中環出席酒會，她坦言十分期待婚禮：「佢哋拍咗咁耐，成十年喇，都應該結婚啦，只係我家姐（龐母陳燭餘）舊年過身，要等一年至得。」
此外，雜誌創辦人趙式浩都有出席酒會，早前女友為他未婚生仔，他透露囝囝跟族譜改名「子勤」（Ian），但未有結婚打算，同場還有妹妹趙式芝、前名陳沛嘉的陳祉妤，式浩母親和同母異父的弟弟黃偉文等都有捧場。
採訪、攝影：林嘉慈、梁錦雯