車路士啱啱喺上一場英超贏咗保頓、拎到救命3分，之前一路話有油王班主阿巴莫域治力撐、乜都冇有怕嘅領隊波亞斯，你又真係估佢唔到，忽然疑神疑鬼話同油王關係有異，好驚突然被炒喎！
驚同阿巴關係有變
車路士喺上周六英超主場3:0大勝保頓，自從波亞斯入主後，球隊家得勝率都仲係得49%，係油王時代9位領隊最低嘅一個；但波帥會畀球會炒魷嘅傳聞唔係今時今日先有，你老哥喺球隊最低潮嘅時候，夠膽同一班老波骨對抗，話有老細力撐，之但係啱啱贏完波竟去唱反調。
波亞斯話怕同阿巴嘅關係隨時有變：「我估阿巴莫域治對我都依然有信心嘅，但好多時班主同教練嘅關係，可以突然一下子惡化；就算當時隊波成績唔錯都好，要唔要變純粹取決於佢嘅諗法。之後會點？不外乎都係繼續得到支持去進行計劃，一係就歷史重演，會喺聽日定兩年之後先發生？我真係唔知道。」家車路士嘅情況，其實同上年呢個時候一模一樣，只係換咗個經驗比較淺嘅主帥。車路士家踢咗26場英超拎咗46分，上年呢個時候，安察洛堤揸旗嘅車仔只係得45分。
又預咗下季買舊部侯克
波亞斯同阿巴莫域治關係現裂痕，據講同上場英超嘅排陣有關。上周歐聯輸畀拿玻里，波仔將林柏特、艾殊利高爾同艾辛貶為後備引起軒然大波，3位球員喺對保頓場波全部復任正選，有傳就係阿巴嘅主意。波仔之後大讚林伯表現好夠晒專業，仲話希望佢今季之後繼續留低，係真心定假意大家心裏有數。
嗰頭話車路士份工可唔可以捱到季尾都唔知，但波亞斯呢頭又話下季要買舊部波圖前鋒侯克：「我仲需要一位有爆炸力嘅側擊球員，有單對單過關斬將能力，侯克就啱晒我要求。」波圖一直企硬要收到1億歐元贖身費先肯賣侯克，波仔你都係求神拜佛喺今季英超爭到前4，又或者歐聯奇蹟封王，之後先諗下季罷喇。