前港甲兵登陸巴甲！巴甲富豪球會哥連泰斯周三喺官網公佈，正式由中超南昌衡源羅致早年踢過港甲公民嘅射手陳志釗（上圖），合約期至下年12月；而祖籍廣東番禺嘅釗仔仲成為巴甲史上第一位中國球員！據悉，球會為紀念華人移居巴西200周年，有意安排釗仔着200號波衫，又喺官網為佢搞投票，睇吓印咩名喺件波衫度，認真有「飛士」。
本月14日就24歲嘅釗仔，人仔矮矮，但腳法唔曳。07年加盟公民踢咗兩季（圖），贏過足總盃；之後返番國內幫南昌升上中超，更被球迷選為最喜愛球員，難怪葡甲嘅費倫斯同巴甲哥連泰斯都爭住要佢，仲搞到釗仔同南昌出現糾紛而一度冇得踢，好彩家一天都光晒。
公民眾隊友都戥佢高興。中堅趙俊傑話︰「佢既有速度，盤扭技術又好，能夠加盟巴甲都祝佢有更好嘅成就，亦證明喺港甲嘅中國、香港球員，都有條件外闖。」