七、八十後大男孩，大概都會記得《龍珠》入面一幕幕的熱血激戰，如果你都曾迷戀那份拳拳到肉的快感，《阿修羅之怒》一定啱你！齋睇格鬥場面比《龍珠》更爆更熱血，加上型爆人物及動作設計、勁多動畫元素，仲要充斥大量跟畫面㩒掣嘅QTE，打得咁激嘅動作Game，原來都可以斯斯文文咁玩！
記者：韓繼聰
迫力劇情×華麗畫風
《阿修羅之怒》被稱為體驗型戲劇性遊戲，劇情自然成為重要一環。故事主角阿修羅本為神，點知被人屈不特止，仲要老婆被殺、個女被捉，真係聞者傷心，所以Game名索性叫《阿修羅之怒》！由於佢失咗憶，劇情中有不少回憶插敍，逐步推進劇情。最抵死係包裝成一集集動畫，中段間場、結尾會出現「下回分解」日文字，加埋次回預告同上回提要，似足睇卡通。
劇情以外，其華麗畫風亦受到不少好評，人物及背景設定帶有強烈的東方神話元素，同時亦加入科幻元素，打鬥場面亦極具迫力，爆缸斷手，拳拳到肉，包保睇得熱血沸騰，真心覺得《阿修羅之怒》就算唔係遊戲，而係動畫，一樣會大獲好評！
熱血動作×指令×射擊
隨劇情發展，遊戲部份會越嚟越多。不過不能否認遊戲難度的確不高，建議玩家可以一嚟就玩高難度，相信可以更能體驗熱血格鬥的快感。遊戲以動作格鬥為主軸，操作簡單直接夠爽快，而當中亦夾雜咗「QTE」及「射擊」元素。劇情或格鬥途中，會有唔少突然出現的按掣指令，只要啱時機按掣就能達成要求，例如要KO大佬跟指示按掣，便能引發熱血到痹嘅KO動畫。另外，由於阿修羅不時要對付體型極大嘅敵人，遠距離射擊亦成為其中一個作戰方法，要利用Analog控制瞄準器再進行射擊。
雖然《阿修羅之怒》冇得儲嘢升呢，加上版數不多，耐玩性有點不足，但遊戲形式同種類都頗為新穎，加上大量吸引動畫，都不失為一隻好Game！
《阿修羅之怒》
機種：PS3/XB360
類型：動作指令
人數：1人
發行：CAPCOM
售價：$328
