崔建邦前年12月14日因為醉酒駕駛被法庭判罰款六千蚊同停牌九個月，仲必須喺三個月內完成駕駛改進課程，最近見邦邦都好生性，好刻苦咁做助導工作，去街只係做乘客，今次真係好嚴守紀律，點知噚日運輸署出咗張傳票畀邦邦，票控佢「沒有修習和完成駕駛改進課程」，傳票係喺舊年8月24日發出，家呢單案件會押後到4月10日再審。
賴搬屋收唔到信
馮仁昭即刻打電話畀邦邦，佢已經知道有傳票畀佢，仲喺電話度好認真咁話：「其實係因為我搬咗屋，收唔到有關嘅信件，而且原本個課程係要攞番車牌前兩個月去上嘅，課程上兩日加埋幾個鐘，但因為我冇諗住再揸番車，以為唔攞牌就唔使上，加上做助導冇乜時間，咪冇去上囉。」
邦邦知道今次係自己疏忽，收到記者嘅電話後即刻做嘢，嗱嗱聲上網去番運輸署嘅網頁，下載更改地址表格，佢話會即刻安排時間去補上番嗰個駕駛改進課程。咁如果上完個課程，邦邦仲會唔會考慮揸番車？佢話暫時冇咁嘅打算。
案件編號：KCS29623/11