於80年代風光一時的紅唇王子蔡楓華（Ken），因一句「剎那光輝不代表永恆」一沉不起十多年，他最近終於重新振作，上周五記者發現Ken在灣仔健身室狂操兩粒鐘，年屆51歲的他，拉筋、踢腿完全面不改容，最厲害是他全程戴上黑超依然操練自如！
顛沛流離了好一段日子的蔡楓華，去年初再出擊，假九展舉行了三場個唱後，將於下月七日首度進駐紅館舉行一場「情陷紅館演唱會2012」，為了自己入行31年來的首場紅館個唱，Ken正積極備戰，望以最佳狀態演出。
喪跑半粒鐘
上周五下午二時許，Ken戴着黑超、以一身運動服獨自現身灣仔天樂廣場一間健身室操練，他先跟教練進行拉筋等熱身運動，Ken雖已51歲，但見他手腳靈活，筋骨柔軟，輕易地做出拉筋、踢腿等動作，之後他玩了啞鈴、跑步機、打沙包、擴胸機、引體上升及練腿機等。
Ken在跑步機喪跑半粒鐘後，依然神態自若，但最奇怪是他跑到大汗淋漓，滿臉通紅，依然堅持全程戴黑超，以及着風褸及長褲。
記者事後致電Ken，他說：「減肥係其次，主要練氣力，上台要好多體力，練咗幾個月，如果有時間會日日練，每次練兩、三粒鐘。」Ken曾揚言「就算交唔出六嚿腹肌，都要交兩嚿」，見他健身都包到冚，是否要留待演唱會才露肌肉？他笑說：「上次只係諗住講笑，唔係每個人都要除衫。」
腳傷無大礙
早前Ken亮相《勁歌金曲》不慎扭傷右腳，他說仍在接受物理治療，記者亦發覺他健身時主要練腿部肌肉，問Ken開騷時會否受影響不能跳舞？他說：「等咗咁耐，令次點都唔理，上到去就會搏命同瞓身，睇吓觀眾鍾唔鍾意我跳囉，如果大家都想我跳，我點都要跳，我嘅腳傷應該冇影響。」
採訪：溫敏芝
攝影：陳慧安
