苗僑偉（三哥）、林峯、黃智賢同官恩娜（Ella），噚日喺油塘為無綫劇集《雷霆掃毒》拍場開槍戲，三哥話呢套劇好多動作戲，又要跑樓梯又上又落，成套劇都好落本拍㗎，佢話：「今日都跑咗成朝，好彩事前都做好熱身，阿峯同Ella就慘囉，兩個受傷都要跑。」Ella話可能事前做唔夠熱身所以拉傷大髀肌肉，好彩阿峯都有介紹醫生叫佢睇。Ella話唔怕同阿峯合作而傳緋聞，咁又係，話晒阿峯同吳卓羲係兄弟相稱，又點敢媾兄弟嘅前度吖！
望捧影帝獎
林峯之前整親坐骨神經一直都未好番，噚日又拍動作戲所以都話痛痛地，講到英皇捧鄭嘉穎坐佢個位，佢話：「我幫佢坐暖咗㗎喇，而且我成日都四圍飛，大家好多年冇合作過，都想有機會合唱。」即係想同嘉穎換位做視帝喇？林峯話：「我都希望有日可以加入視帝行列！不過我向來唔係好睇重獎項！」
另外，黃日華轉投王維基，三哥就話對方都有搵過佢，不過自己同TVB仲有好長合約，問到佢知唔知黃日華係咪喺TVB好唔開心，三哥話：「佢係想轉吓環境，而且佢哋又可以畀到可觀嘅數字，仲可以上唔同電視台。」