溝女冇罪，食煙有錯！球員都係人，男歡女愛平常不過，所以南華嘅26歲前鋒陳肇麒（陳七），日前被本報娛樂版影到同22歲媽模陳靜儀（Mia）煙韌撐枱腳，足主羅傑承都冇話詐型；之但係陳七當街煲煙，嚴重影響球隊形象，羅生就忍無可忍話要扣佢兩個月獎金！
微博貼潮文氹女友
「人食我又食，不如人戒我都戒啦！」戒就係戒，但早年幫衞生署拍戒煙宣傳短片，講過呢番說話嘅陳七，煙就戒唔到，反而女就「」唔少。圈外女友Natalie、妹李綺雯、模劉雅婷（Toby），甚至日前被撞破去羅生新開嘅上海餐館「上海佬」撐枱腳直落嘅Mia……，隨着陳七09年東亞運成名，身邊女性好友猶如走馬燈。未婚嘅陳七邊個都冇所謂，亦都唔到作為球迷嘅你同我管，就連羅生日前喺球會Blog都講得好清楚，「球員嘅私人感情事，我冇任何意見。」所以話，溝女係無罪嘅。
不過，聲稱冇偷食嘅陳七，為咗氹番女友Toby，除咗前日為南華上陣對大埔嘅聯賽盃8強，入波後做出T字慶祝手勢外，噚日亦喺微博貼潮文，話巨蟹座嘅人（暗示自己）受到傷害，寧願一個人暱埋舔傷口，都不會傷害對方分毫。講到咁委屈，女友條氣順番未就唔知；但賽後當晚，羅傑承就率先喺Blog貼文，話會處罰被影到煲煙嘅陳七！
吸煙危害獎金。陳七今次當街煲煙，影響球會形象同自己體質，羅生起火大興問罪都好正常，但話要扣陳七2、3月獎金，阻嚇程度有幾大就見仁見智。據悉南華每場贏波有1,000蚊，連捷2,000，最多3,000；2月埋單計數，陳七大概有4,000蚊獎金，未計3月獎金（南華尚有4場波），對於月薪連獎金月入約5萬嘅陳七嚟講，幾千蚊煲支煙，豪一次、換個娛樂版頭條又有乜所謂呢！