內地億萬富商楊國華，上星期三晚喺樟木頭寓所露台坐欄杆煲煙時不慎墮樓身亡。原來楊總係盧敏儀老公孫敬安老友，舊年孫敬安搞蔡楓華復出個唱，楊總都有份投資。而楊總旗下盛泰文化仲簽咗陳啟泰同李蕙敏（Amanda），舊年楊總幫陳啟泰出嘅唱片《BabyBaby》，喺內地都攞咗唔少獎。
馮仁昭噚日打畀Amanda，佢就好震驚，仲話兩年前曾經簽畀盛泰文化出一張唱片，佢話：「因為內部好亂，過咗一年半合約期限完咗都出唔成，約滿後我冇追討，大家亦冇聯絡，希望佢家人唔好咁傷心。」
孫敬安送最後一程
至於孫敬安前晚喺電話中依然好傷心，佢話：「佢死嗰日我同佢通過電話，佢話LED公司就上市，叫我認購啲股。點知星期四就接到佢屋企人電話話佢死咗，下晝火化，我即刻上去睇佢火化同做埋場法事。」問到楊總死因，孫敬安話：「佢嗰晚好開心，飲咗啲日本清酒，可能開心得滯跌咗落去。當時得佢同一個財務總監喺度，佢財務總監話係咁，我哋冇嘢查到係唔係㗎！」
另外，陳啟泰噚日同甄詠珊為亞視《撻着》錄影最後一集，仲移師郵輪拍攝，認真大陣仗。