雖然豬狼經常有新料爆,不過一味鬥出口技,觀眾早睇到厭。不如利用PSV個鏡頭,化身3D虛擬戰士。糖糖唔好飲紅酒,索性拎個樽嚟扑對手;震鷹亦唔好花時間拆解西九醜聞,攞個滅火筒嚟噴人仲實際,兩大「猴損人」生死相搏,普羅大眾一定叫好!
記者:許福合
攝影:劉永發
Model:Kinki@PureModels
逐步「造」人
1.先以PSV前或後鏡頭拍攝頭部,對準五官、見到Perfect字樣為之合格。
七成似真人
講惡搞格鬥Game,九成機迷諗起《真人快打》,不過論最騎呢,肯定非PSV最新作《RealityFighters》莫屬。最過癮利用機身前或後鏡頭,拍攝真人或相片頭像,PSV便可自動運算成3D人樣,再Set埋身形、衫褲鞋襪同武器等,全部Parts多達400項,讓你Set到滿意為止,將真人打扮成虛擬戰士!筆者以糖糖同震鷹頭像測試,發現模仿度達七成以上,尤其糖糖爆樽攻擊、震鷹奸笑Pose等,全都形神俱似,相當抵死過癮!若有閒情,索性將仇人、老細、死黨全部Save做虛擬戰士,圍埋大亂鬥互毆一餐,就算生活上有乜不滿,相信頃刻間都可宣洩出嚟。唯一小彈係臉形無得改變,想Set大肥佬、尖頭人就無咁似喇。
AR卡定位唔怕飛出界
每次開打前都先選擇場景,亦可透過機背鏡頭,擷取現場環境作戰鬥舞台,而PSV好聰明地自動揀選「落腳點」,就算背景有幾複雜,都可合理地化身戰場。不過實戰多場,Chok招稍為激烈,偶爾出現飛出鏡頭外,又或角色定位消失問題,好彩遊戲附一張AR卡,只需放入實景中,遊戲就以這卡水平立腳點,打得幾激都無咁易走位。
隨住打爆故事模式、時間及挑戰賽,可解鎖更多道具、場景,甚至動作風格,例如霹靂舞Style,出招時會在地上自轉,若選芭蕾舞就會用旋風腿攻擊,甚至創番套「震鷹爪」,偷襲對手下半身等,全都搞笑非常。
《RealityFighters》
機種:PSVita
類型:格鬥
人數:1至2人(支援連線)
售價:$228(下載版$211)