政府統計處發佈2011年人口普查報告，不少報紙報導撮要，大都附有一條標題：「香港貧富懸殊，愈扶愈貧」，但睇番啲數字，似與標題不符，於是左丁山特登去買一本「2011人口普查」嚟睇下，將啲數字推算一輪，得到嘅結論係由2001至2011年，香港人收入向上移，情況向好，甚麼愈扶愈貧之言，全是胡說，好心啲電台評論員，新聞記者與編輯唔好腦筋懶惰，請做吓功課先。
「2011人口普查」表25，「住戶收入」有2001、2006、2011年嘅香港家庭住戶每月收入劃分，最低收入由少於二千元起，最高收入至高於十萬元止。最低收入家庭（上至每月四千元）嘅數目在01至06五年間大幅度增加，由163,423戶增至205,515戶，五年內增加四分一有多，到了2011年，數目增加到214,726戶，五年增幅為4.5%，增長率大大放緩，為何如此，要注意01至03年香港經濟由好變差到極，04年起先開始好轉、06至11年經濟增長唔差，極低收入家庭數目立即增幅放緩，在呢個收入水平嘅住戶，應是半失業人士，新移民。內地人憑單程證每日150人可來港，十年就會增加547,500人，以平均每戶三人計，即182,500戶，因單程證入口派額未用足，當係五成使用率，十年間便有九萬戶入境，而貧窮戶（月入少於四千）在十年內只係增加51,303戶！如果有人深入研究調查嘅話，新增貧窮戶來源極有可能係新入口嘅，正是香港每日輸入貧窮，與甚麼扶貧政策無關。
試將香港家庭數目以每月收入劃分為三大類，睇吓唐英年所講之欖球型社會結構是否成立。在2001年，月入少於一萬者有493,502戶佔24%，月入一萬至二萬九千九百九十九元者有963,887戶，佔47%，月入三萬至九萬九佔529,172戶，佔25.8%，月入超過十萬元有66,851戶，佔3.3%，幾合符兩頭尖中間大嘅型態。好嘞，十年後嘅2011年，月入少於一萬者佔563,915戶，佔23.8%；一萬至三萬者有980,062戶，佔41.4%，三萬至十萬者有713,391戶，佔30.1%，月入逾十萬者有111,428戶，佔4.7%，2011年嘅型態就係低收入戶略少，高收入戶大增，數字清楚話俾我地聽，香港人收入向上移，社會向上流動力好高，除非高收入者又係新移民！