舊年港股無運行,押注喺股市分分鐘白忙一場,不幸嘅更會損手,股評人出身嘅香港投資者學會主席譚紹興當然曉得分散投資嘅好處,所以佢除咗好似城中富豪咁收藏名畫之外,近年亦經常投資其他非房產類嘅實物,好似紅酒、郵票同埋茶葉咁,回報仲可以跑贏大市㖭。
譚紹興同華華講,自08年金融海嘯同雷曼倒閉後,覺得股票同債券都唔夠穩陣,於是開始搵另類投資途徑,近年迷上咗集郵,佢話投資郵票好過紅酒,「紅酒價格升跌同股市有關連,但郵票就唔同,尤其同中國歷史有關嘅郵票,升值能力同經濟脫鈎,係最好嘅資金避難所。」
祖國郵票三年升49%
佢話以前中國窮,有紀念價值嘅郵票都畀外國人買晒,但家中國人有錢,想買番以前失去嘅嘢,好似郵票由09年至今已經升咗49%。佢仲成立咗「中國100郵票指數」,由09年嘅市價做基數,計算國際郵票價值,「我家六成幾嘅資金用嚟買股票,三成幾就買藝術品,最近仲用咗500萬投資郵票,遲啲仲會喺新加坡或者內地設立郵票基金做投資。」譚紹興又話,香港證監會太嚴格同死板,好似內地已經有紅酒、郵票同茶葉基金,香港就好難有呢類投資機會嘞。
李華華
mailto:[email protected]