油價急升，普通汽油都要$17.15一升，再者伊朗局勢未定，預期油價會持續上揚。嘩！各位車主點忍？相信純電動車發展是油魔剋星。大眾汽車（Volkswagen）首部純電動車E-Golf，經過成都、深圳等站長征後，終於踏足香港，試過車的黃宇詩都話「好推背」。
記者：蕭漢祥
攝影：林栢鈞
快充半小時搞掂
無論是油價高企，還是支持環保，改用混能車或純電動車都是大勢所趨。繼日本品牌之後，歐洲代表大眾汽車的綠色力量終於殺到香港，上周末一連三日於亞洲博覽館舉行大眾環保車巡禮，以「大眾e起來駕馭藍創意」為題，展出E-Golf及Touareg混能車。
焦點所在，當然是E-Golf吧！話晒係大眾首部純電動汽車，吸引力連當日擔任司儀的黃宇詩（Ursule）都忍唔住要試一試，她說：「我之前曾駕駛過純電動車，感覺不錯，令我更期待今次的E-Golf。」完騷後她第一時間跟筆者走上E-Golf試駕，油門一踏，她即時大叫：「好推背呀！」當然，E-Golf的270Nm扭力一開始便全數釋出，再者它的「能源方塊」由180個鋰離子電池單元組成的30個電池模塊組成，最高輸出115匹馬力，連續輸出功率為69匹，極速達每小時140公里，續航力可行駛150公里，與現行在港較多人使用的日本電車幾乎睇齊。
外形上，E-Golf跟汽油版Golf並無分別，皆因以汽油版作研發基礎，充電線接駁口設於車頭鬼面罩，只要打開大眾汽車的徽章便可接駁充電，據講快速充電半小時就搞掂。不過，由於行走時無引擎聲，為安全計，E-Golf新增模擬行車聲音，讓周邊路人意識到它的存在。阿詩試駕後說：「我覺得外形唔只討好，動力表現更可謂強勁。」由於現時依然是展覽階段，尚未正式量產，所以車價有待公佈，阿詩就大膽預計車價介乎40至50萬元之間，就等着看看你的眼光吧！
E-Golf
引擎：85千瓦電動馬達
馬力：115hp
扭力：270Nm
37度傾側不翻車
同場的TouaregHybrid大家咪以為只屬配角就睇小佢，皆因廠方大騷它的強悍越野性能，在試車區搭建多座傾斜及波浪型台板，行車時就算前後兩輪懸浮空中，藉着電子系統發揮高達3.5噸牽引力，上山落海真係無難度。筆者有機會落場一試。先有車身向左傾側達35度的斜坡，指導員還示範即使大幅傾側，在車內大力搖動也不怕翻車。場中央的台板，更突破廠方公佈前後傾角30度，設定為向上攀爬終極37度，非常壯觀。
但……大家不要忘記，這部混能車有3公升V6機械增壓引擎配電動馬達，總輸出380匹馬力，極速每小時240km，但油耗只是8.2L/100km。尤其是行走城市路面下，燃油效率提高25%，以現時$17.15油價計算大約$1.4/km，二氧化碳排量僅193g/km，結論是混能系統配上高性能引擎後，既可享受絕佳的動力表現，同時又環保節能，對於傳統汽車真係「既狼且辣」的攻擊。
TouaregHybrid
引擎：2,995ccV6Supercharger
馬力：333PS/5,500-6,500rpm
扭力：440Nm/3,000-5,250rpm（混能總輸出：380PS馬力及580Nm扭力）
傳動：8前速自動
售價：$998,800
查詢：36989888（VolkswagenHK）