娛圈中女爭趕尾班車脫離敗犬惡名，但下月底便33歲的新一代才女卓韻芝卻不甘被一個男人私有化，她近日周旋於德、法籍洋漢之間，有指末日在即，三角關係令阿芝樂不可支，她享受確認成為情侶前的曖昧關係。訪問中阿芝大膽談情說愛，自爆一夜情唔夠喉，笑言最少要玩三晚，這番言論不愧為現代性女。 撰文：比華利
誰不愛才，新一代才女卓韻芝近日成為老外的搶手貨，德籍金融才俊和法籍男模出招爭奪芳心，雖然三角關係難搞，但看到左右逢源的阿芝應付得毫無難度，就算真的如舊愛Mr.成員MJ揶揄八國聯軍殺到，相信才女都揮灑自如。
沐浴愛河甜到漏的阿芝，卻形容自己的感情世界正處末日狀態，阿芝說：「成日話今年會世界末日，死前我乜都想試吓，冇理由畀自己咁多遺憾，我要放膽啲，我要為我終身負責任，大家唔使為我擔心。」在阿芝的字典裏，擇偶沒有特定條件，只求啱感覺啱時間，她說：「如果擇偶有附帶條件就等如有包袱，我唔相信膚色種族，只相信人夾人，我承認我係好麻煩，又要認識，又唔要身體接觸，我真係似貨架上嘅一排電芯。」
給同志友人過目
過往受過無數情傷的阿芝，竟未有在失戀中汲取教訓，她說：「我仲未知自己想要乜，乜嘢都試吓先，家就去追求自己想要嘅嘢，我唔覺得有乜嘢要咁羞愧，找尋真愛唔係錯，錯好多次都只係唔想最後先知係錯，好多女仔真係埋牙先知錯。」阿芝深信再接再厲，必覓得真愛，她笑言當遇上心儀對象，就會帶給男同性戀朋友過目幫眼，她說：「如果我班基佬friend過目完猛話hot嘅話，我就可以試吓！」難怪阿芝周旋在德法兩男中都樂此不疲，她不擔心跟老外拍拖有語言隔膜嗎？阿芝說：「邊會有，好似報紙出咗我哋夜蒲相，佢哋唔識中文唔知講乜嘢，有隔膜最好，任我點繙譯都得。」
阿芝口中所指的「試吓」可是指跟男伴一夜情？她幽默的回應：「我一晚唔夠皮，最少都試三晚啦。不過諗到即晚玩完就去新相識嘅男仔屋企過夜，去到佢度又冇得落妝，真係好唔方便。不過，有時鍾意……惟有用水去抹（指落妝），去得三晚嘅就要留埋電話。」雖然阿芝接受一夜情，但她始終享受男女新相識曖昧交往的過程，她坦言：「我好享受嗰種尋尋覓覓，欲拒還迎嘅過程，真係幾好。」阿芝也怕彼此交往後，看透優點缺點時，大家因愛成恨變寃家，再見不是朋友的關係不好受，她說：「我怕咁快會冇咗個朋友，朋友關係緊要過大家瞓兩晚，點解要咁快破壞咗大家嘅關係。」
意外懷孕一定生
思想新潮的阿芝會接受奉子成婚嗎？她衝口而出：「有咗都唔一定要嫁畀佢，我鍾意小朋友，但我都想自己個小朋友將來過快樂嘅生活，萬一意外地我有咗，我一定會生佢落嚟。」她表示曾在街上見到一些不會照顧子女的父母，她很為他們的子女痛心。
愛孩子的阿芝笑言將來肚皮產量無極限，她說：「我份人咁多正能量，梗係生多啲出嚟，生幾多個只視乎將來間屋有幾大，大就生多啲，唔通要一家七口迫喺碌架床咩，生仔生女我都咁鍾意。」可想跟哪個藝人配種？阿芝玩盡中性的何韻詩和皮膚黝黑的古天樂，她搞笑說：「生女打扮一定唔可以似阿詩，生仔唔好似古仔咁黑，怕佢缺氧。」
那可想像梁洛施一樣為李澤楷這些鑽石王老五生孩子？阿芝口快快說：「佢（李澤楷），OK喎，佢都唔返屋企嘅，咁我可以成日去『躝』街，不過我唔想去加拿大住，可唔可以我生咗去巴黎，咁我可以日日去買vintage。」
阿芝去年邀請古天樂做棟篤笑騷傳緋聞，當時她胸襲古仔，下月再開騷可會「安哥」緋聞男友，阿芝即大講有味笑話：「摸慣晒，唔好啦，除非畀佢摸我，又或者佢肯畀第二啲器官我摸，一係靠佢剝蛋上台，如果唔係只請佢嚟睇算啦。」她表示近日受黃德斌的42吋胸肌吸引，目不轉睛外還有伸手向螢幕伸過去的衝動，言語間似暗示有意邀請他做嘉賓，但為保神秘，嘉賓名單仍要保密。
化妝：MickyChoyofsuchagood
髮型：ZiggieLoofSalonLaMod
服裝：IzzueCollection 場地：IrocoDesign
愛重口味裝身
衣着品味見人見智，有人愛簡單，有人愛潮爆，熟女卓韻芝最愛別樹一幟的mix&match，她這次接受訪問都以兩個型爆look出鏡，其一是頭頂皇冠高髻，另一套是如嫁衣的拖尾長紗裙。
阿芝形容皇冠是末日聖母后冠，她說：「預言家成日話今年世界末日，如果真係剩番一年命，做乜唔試新嘢。」那個高髻是紙造皇冠再貼上髮片和吊飾，十分精緻，數磅重頂在頭上拍照令阿芝頸部痠軟，邊拍邊叫攰。
「平日生活太悶」
時裝觸覺強的阿芝直認愛重口味，她說：「我着衫鍾意揀啲可以影響人思緒嘅，好突然吸引人目光，平日生活太沉悶啦，我寧願着錯衫都唔着悶衫。」她自爆有次出街胡亂把沙發上的衣物配搭上身，結果錯有錯着，她否認自己標奇立異：「我係奀皮啫，我自細好怕悶，衣櫃唔會只有黑白灰，我愛鮮艷顏色，好鍾情將佢哋撞埋一齊。」購物狂阿芝愛周遊列國尋寶，每季約花20萬置裝。
歐遊獵男話咁易
卓韻芝下月在灣仔會展舉行三場棟篤笑，據知主題圍繞夜蒲和出遊獵男秘笈。近日被拍到連環鬼仔的阿芝，夜蒲當然最知「掟」，她說：「夜蒲要玩得開心，首要搵啱蒲友，最忌飲醉喪喊，同埋爭仔暴力王，嗰啲人係掃興王，遇到佢哋我會立即走人過海轉場。」
絞盡腦汁度橋
如何外遊有艷遇，阿芝建議亞洲女仔選擇到歐洲旅行，她抵死說：「外籍男性唔識分亞洲女人年齡同樣貌，邊個去都吸引到佢哋。」阿芝上回開騷已叫好叫座，她相信仍有進步空間：「上次做騷我畀自己95分㗎，好夾個感覺，但我事後睇番碟，跌番去80分，今次要做好啲。」為了達標100分，阿芝近日不停絞盡腦汁度橋。
卓韻芝死去活來OneNightStand
日期：3月17－19日
地點：香港會議展覽中心Hall5G
